Meclisa Giştî ya Şêxmeqsûd û Eşrefiyê: Tirkiyê nikare îradeya gel têk bibe

Meclisa Giştî ya taxên Şêxmeqsûd û Eşrefiyê ya Helebê îro daxuyaniyek der barê êrişên dagirkeriya Tirk ên li ser Bakur û Rojhilatê Sûriyê û Şehbayê de da.

Daxuyanî li pêşiya navenda Meclisa Giştî ya taxên Şêxmeqsûd û Eşrefiyê ya li beşê rojava yê taxa  Şêxmeqûsdê bi beşdariya endam û rêveberên komîn û meclisan û Kongra Star, ji aliyê endamê rêveber ê Meclisa Giştî, Mirî Şiblî ve hat xwendin.

Di destpêka daxuyaniyê de hate gotin: “Di vê dawiyê de êrişên dagirkeriya Tirk ên bi balafirên bêmirov ên biçek zêde bûne. Armanc ji van êrişan têkbirina aramiya herêmên Bakur û Rojhilatê Sûriyê ye, di encamê de kuştin, talankirin û tirs li wan herêman çêbûn, nexasim piştî hedefgirtina kesayetên pêşeng ên ku şerê DAIŞ’ê kirine. Ev êriş di heman demê de encamên binketina dagirkeriya Tirk li herêmên Parastinê yên Medyayê li hember gerîla ye. Her wiha dagirkeriya Tirk bi armanca dûrxistina gel ji rêveberiyê û têkbirina ewlehiyê, wê bi rêya ajanên xwe yên li herêmê dest bi hedefgirtina sivîlan jî kir.”

Di daxuyaniyê de bang li Neteweyên Yekbûyî (NY) û rêxistinên navneteweyî û hiqûqî hate kirin ku li hember van binpêkirinan helwesteke cidî bigirin.

Dawiya daxuyaniyê wiha bû: “Dewleta Tirk nikare îradeya gelê me têk bibe, em ê têkoşîna xwe û piştgiriya xwe ji Rêveberiya Xweser re bi hemû derfetên heyî bidomînin.”

 (mh)

ANHA