Servîsa kurdî ya Navenda Kurdî ya Lêkolînan dest bi weşanê kir

NKL ku di sala 2014`an de hatiye avakirin, saziyeke serbixwe ya lêkolînên siyasî, aborî, civakî û stratejîk ên têkildarî Rojavayê Kurdistanê, Rojhilata Navîn û cîhanê ye.

NKL`ê heta niha bi zimanê erebî weşana xwe dikir, lê ji îro û pê ve dest bi weşana servîsa  kurmancî jî kir.

Têkildarî mijarê NKL`ê li ser hesabên xwe yên torên civakî daxuyaniyek belav kir û tê de destpêkirina servîsa kurmancî ragihand.

NKL`ê di destpêkê de bal kişand ser bandora şoreşa Rojavayê Kurdistanê ya li ser zimanê kurdî û wiha diyar kir: “Li Rojavayê Kurdistanê zimanê kurdî asta xwendin û nivîsandinê derbas kir û bi rêya hînkirinê bû zimanê jiyan û zanistê û bi sed hezaran zarok her sibe berê xwe didin dibistanên bi kurdî. Êdî xewna Celadet Bedirxan û tevahî rewşenbîr û têkoşerên Kurd pêk hat û vê yekê bandoreke mezin li gelê Kurd ê li her çar parçeyên Kurdistanê kir." 

NKL`ê ragihand ku ew hewl dide bi rêya lêkolînên xwe, xwe bigihîne hemû malên Kurdan û wiha dewam kir: “Piştî kedeke mezin ku ev çend meh in dewam dike, me bi dehan lêkolîn û gotarên girîng ên der barê Kurdistanê û tevahiya cîhanê de amade kirin û êdî li ber destê xwendevanên Kurd in. Êdî em ê hemû lêkolînên girîng ên der barê rewşa herêmê û nexasim Rojavayê Kurdistanê de bi awayekî zanistî û bi kurdî amade bikin."

Navnîşanên NKL’ê ev in:

Malper: https://nlka.net/ku/

Facebook: https://www.facebook.com/Navenda-Kurd%C3%AE-ya-L%C3%AAkol%C3%AEnan-101483982652022

Twitter: https://twitter.com/nlkurdi