​​​​​​​Şêniyên Tirbespiyê amadebûna xwe ji bo parastina herêmê nîşan dan

Ji ber gefên dewleta Tirk a dagirker ên li dijî herêmê, kiryarên wê yên hovane der heqê sivîlan de, timayên wê yên dagirkirina xaka Sûriyê û ji bo gel xwe ji bo parastina destkeftiyên şoreşa xwe amade bikin, Rêveberiya Xweser a Bakur û Rojhilatê Sûriyê rewşa awarte li seranserî herêmê ragihand.

Her wiha Rêveberiya Xweser berê jî diyar kiribû ku ragihandina rewşa awarte bi wê armancê ye ku sazî, komîn û meclisên gund û bajaran xwe ji bo parastina xaka xwe tedbîran bigirin.

Rêber Abdullah Ocalan wiha parastina û rola wê di civakê de pênase dike: “Parastin tiştekî beolojî û civakî ye. Ji kesî re nayê berdan. Hin nêrînên gelan wiha hene ku artêş û dewlet mirovan diparêze. Ev yek şaş e û ji rastiyê dûr e. Mafê parastinê mafekî rewa, pîroz e û ji kesekî re nayê berdan. Kes ji ber kesekî din parastinê nake. Eger yek bi xwe parastinê neke ew ê ji wateya mirovatiyê dûr bikeve û bibe kole û mirîdê kesên din.”

Der barê vê mijarê de, şêniyên navçeya Tirbespiyê ya kantona Qamişlo nîşan da ku ew ji bo rûbirûbûna bi êrişên dagirkeriya Tirk re li gor bingeha şerê gel ê şoreşgerî amade ne. Welatiyê bi navê Ebdî Xelef diyar kir ku bi giranbûna êrişên li ser Bakur û Rojhilatê Sûriyê re, pêkhateyên herêmê êdî girîngiya parastinê nas dikin.

Xelef got pêwîstiya qonaxa hemdem bi xwerêxistinê li gor fikrê rêber Ocalan ê şerê gel ê şoreşgerî heye û wiha anî ziman: “Rêber Ocalan ji me re diyar kir ku gel çarenûsa xwe bi xwe diyar dike û ew xwediyê şoreşê ye. Îro jî em li ser wê şopê dimeşin ku divê her welatiyek metirsiyên derdora xwe nas bike.”

Xelef wiha domand: “Dewleta Tirk a dagirker siyaseta qirkirina gelan dide meşandin, divê em vê yekê nas bikin ku hebûna me û destkeftiyên şoreşa me dixe metirsiyê. Divê herkes li gor bingeheke şoreşgerî xwe birêxistin bike ji bo parastina welatê xwe. Em wek şêniyên Bakur û Rojhilatê Sûriyê, me bi hezaran şehîd dan û em ê her li ser şopa wan bin, em gavekê jî paşve navêjin û dev ji nirxên xwe bernadin.”

Welatiyê bi navê Hisên Xalid jî got: “Dagirkeriya Tirk ji destpêka şoreşa Bakur û Rojhilatê Sûriyê ve gefan li dijî herêmê dixwe nexasim piştî binkeftina opozîsyon û rêjîma Sûrî di aliyê birêxistinkirina gel de. Berovajî Rêveberiya Xweser a ku xaka Sûriyê parast û teror têk bir. Ji ber wê jî dewleta Tirk a dagirker herêmê û gelên wê hedef digire.”

Der barê erkê ku ser milê welatiyan de, Hisên Xalid got: “Di vê qonaxa dîrokî de pêwîstiya gel bi xwebirêxistinkirinê li gor bingeha şerê gel ê şoreşgerî di aliyên aborî, leşkerî û siyasî de heye. Her wiha divê em piştgiriya hêzên leşker bikinî.”

Xalid wiha pê de çû: “Şoreşa me ne wek şoreşên din e; ji ber ku ew projeyeke demokratîk di nav xwe de dihewîne. Erkê me jî ew e ku em navçe, kolan û gundên xwe biparêzin, ji ber ku dijmin bi hemû awayan hewl dide îradeya gelên ku bi projeya demokratîk bawer in, têk bibe.”

Welatiya bi navê Rifa Murad wiha anî ziman: “Gefên dewleta Tirk a dagirker ne tiştekî nû ne, ew bi salan e hewl dide gelên herêmê qir bike û xaka Sûriyê dagir bike. Em wek şêniyên Bakur û Rojhilatê Sûriyê, me gelek şehîd dan û em ê li ser şopa wan bin.”

Di dawiya axaftina xwe de Rifa Murad destnîşan kir ku pêwîstiya qonaxa hemdem bi piştgiriya şêniyan ji hêzên QSD’ê re û xwebirêxistinkirinê heye.

(mh)

ANHA