​​​​​​​Siyasetmedar: Hikumeta Başûr berpirsê şehîdxistina Ferhad Şiblî ye

Êrişa li ser Cîgirê Hevserokatiya Meclisa Rêveber a Rêveberiya Xweser a Bakur û Rojhilatê Sûriyê Ferhad Şiblî rastî bertekên dijwar ji aliyê gelên Bakur û Rojhilatê Sûriyê tê ku wekî hedefgirtina projeya neteweya demokratîk û Şoreşa 19'ê Tîrmehê destnîşan dikin.

Ferhad Şiblî tevî 3 hevalên xwe, 17'ê Hezîranê di êrişa balafireke bê mirov a dewleta Tirk a dagirekr a li ser erebeya wî de li navçeya Kelarê ya bajarê Silêmaniyê yê Başûrê Kurdistanê şehîd bû. Ferhad Şiblî yek ji stûnên Şoreşa Bakur û Rojhilatê Sûriyê ye, di dirêjahiya şoreşê kedeke bê hempa nîşan da. Ji damezirandinên rêveberiyên xweser li gelên herêmên Bakur û Rojhilatê Sûriyê ye û di pêşxistina rêgezên biratiya gelan û projeya demokratîk de roleke sereke pêk anîn.

'ŞEHÎDÊ NETEWEYA DEMOKRATÎK E'

Hevserokê Meclisa Sivîl a Reqayê Mihemed Nûrz El-Zîb anî ziman ku êrişên domdar ên dewleta Tirk a dagirker ên li ser gelên Bakur û Rojhilatê Sûriyê êrişên tirsonekan e û got: "Ev êriş me ji xeta şehîdan û berxwedana li dijî projeyên dagirkeriyê dûr naxe."

El-Zîb îşaret pê kir ku dewleta Tirk dewleteke dagirker e, tevahî pîvanên navneteweyî bin pê dike û wiha pê de çû: "Komployeke mezin li ser gelên Bakur û Rojhilatê Sûriyê heye, ev komplo bi bêdengiya navneteweyî ya li hemberî binpêirinên dewleta Tirk ên li ser Rêveberiya Xweseriya Demokratîk tê kirin."

Mihemed Nûr El-Zîb bal kişand ser têkoşîna şehîd Ferhad Şiblî ya ji bo pêkanîna azadî û demokrasiyê ji tevahî gelên herêmê re û diyar kir ku şehîd Ferhad ji bo welat û parastina maf û azadiya tevahî civakê canê xwe feda kir, ji ber vê yekê şehîdê tevahî gelên Bakur û Rojhilatê Sûriyê ye.

'TÊKOŞÎNA WÎ WÊ BIDOME'

Sekretêrê Partiya Demuqrat a Kurd li Sûrî (Partî) Nesredîn Îbrahîmî sersaxî ji malbata şehîd Ferhad, gelê Kurd ê Rojava û Rêveberiya Xweser a Bakur û Rojhilatê Sûriyê re xwest û ev tişt anî ziman: "Ji destpêka damezirandina Rêveberiya Xweseriya Demokratîk li herêma Dêrikê ve min şehîd Ferhad Şiblî nas kir. Îro me têkoşer û şoreşgerkî mezin oxir dikin. Şehîd Ferad 29 temenê xwe ji bo pêkanîna azadî, xweserî û mafên hemû gelan veqetand."

 Îbrahîm bang li tevahî pêkhateyên Bakur û Rojhilatê Sûriyê kir ku têkoşîna şehîd Ferhad Şiblî bidomînin û wiha got: "Divê tevahî gel û partiyên siyasî ji bo têkbirina planên faşîzmê yên hikumeta APK'ê têkoşîna şehîd Ferhad Şiblî bidomînin."

'ARMANC RÊVEBERIYA XWESER BÛ'

Hevserokê Meclisa Qanûnsaz a Rêveberiya Xweseriya Demokratîk a Herêma Cizîrê Hikmet Hebîb jî anî ziman ku hedefgirtina şehîd Ferhad Şiblî di çarçoveyê şerê dewleta Tirk a dagirker a ji bo dagirkirna gelek herêman û hedefkirina kesayetên ku di nav projeya demokratîk de kar dikin pêk hat.

Hikmet Hebîb diyar kir ku hedefgirtina şehîd Ferhad Şiblî hedefgirtina Rêveberiya Xweser a Bakur û Rojhilatê Sûriyê, hedefgirtina tevahî pêkhateyên herêmê û hewldanên têkbirina projeya demokratîk e.

Hebîb anî ziman ku hikumeta Başûrê Kurdistanê berpirsê şehîdxistina Ferhad Şiblî ye û bang li hikumeta Başûrê Kurdistanê û Iraqê kir ku der barê şehîdxistina Ferhad Şiblî de lêpirsînê pêk bîne. Her wiha bang li civata navneteweyî kir ku sûc û êrişên dewleta Tirk a dagirker rawestîne.

'LI SER XAKA IRAQÊ SÛCEKE'

Sekretêra Giştî ya Partiya Sûriya Pêşerojê Sîham Dawud di kesayeta şehîd Ferhad Şiblî de hemû şehîdên azadiyê bi bîr anîn, her wiha bal kişand ser asta girêndana gelên Bakur û Rojhilatê Sûriyê bi şehîd Ferhad re û got: "Hebûna bi hezaran ji pêkhateyên herêmê di merasîmê şehîd Ferhad de dide diyarkirin ku cihê wî di dilê tevahî gelan de heye û rola wî di rêxistinirina civakê, avakirin û pêşxistina Rêveberiya Xweser de xurt bû."

Sîham Dawûd di dawiyê de bang li hikumetên Iraq û Başûrê Kurdistanê kir ku li hemberî zêdegaviyên Tirkiyê di xaka Iraqê de ku hewl dide dagir bike bisekine û wiha got:  "Ev sûceke ku li ser xaka Iraqê çêbûye, divê helwesta hikumetên Iraq û Başûrê Kurdistanê hebe."

ANHA