Çalakiya konvedanê ya Kongreya Îslama Demokratîk di roja duyemîn de ye

Kongreya Îslama Demokratîk a li Bakur û Rojhilatê Sûriyê duh ji bo şermezarkirina êriş û gefên dewleta Tirk a dagirker ên li ser Bakur û Rojhilatê Sûriyê û siyaseta guhartina demografîk ku li herêmên dagirkirî têne kirin, çalakiyeke konvedanê da destpêkirin.

Di roja duyemîn a çalakiyê de, oldarên misliman, mele û îmamên mizgefan, nûnerên saziyên civakî, siyasî û sivîl amade bûn.

Kon bi pankartên "Îslam ola dilovanî û aştiyê ye", "Êrişên dewleta Tirk dagir kirin, kuştin û şer e"  û "Ji Erdogan û komên wî yên tirksûrî re : Kurdistanê dê ji bo dijminên mirovahiyê bibe bend" hate xemilandin.

Di çalakiya îro de Hevserokê Kongreya Îslama Demokratîk Mihemed Mele Reşîd Xerzanî axivî û got: "Hemû kesên li vir  bira ne û di heman êşê de hevkar in. Biratiya olî û ya mirovî bi salan dewam kir."

Xerzanî bal kişand ser têkiliyên dîrokî yên di navbera pêkhateyên herêmê de û wiha domand: "Têkiliyên hezkirin û hevgirtinê di navbera pêkhateyan de dewam kir. Ferq di navbera Kurd, Ereb, Misliman, Xiristiyan û Cihû de tune ye. Her yek li ser dînê xwe ye û her yek li hemberî mafê yên din rêzdar e. Dewleta Tirk hewl dide fitneyê derxîne û siyasetên xwe yên desthilatdar ên li ser derew û xirabiyê hatiye avakirin, belav bike."

Xerzanî bal kişand li ser sûcên li herêmên di bin dagirkeriya Tirk de û got: "L tevahî herêmên dagirkirî yên ji aliyê Tirkiyê ve tên birêvebirin rêveberî û îrade tune ne. Divê em bizanibin ku kuştin û wêrankirin dawî li aloziyê nayîne."

Hevserokê Kongreya Îslama Demokratîk a Bakur û Rojhilatê Sûriyê di dawiyê de got: "Em tevahî eşîre, oldar û saziyên sivîl û partiyên siyasî di bin vî konî de kom bûne ji ber êşa me yek e û hêviya me ya yekane bi rêya berxwedana hevpar xilasî ye."

Endama Kongra Star Saliha Keleş jî axivî, îşaret bi fedekariyên şehîdan kir û got: "Divê li hemberî van fedekariyan em erkên xwe bi cih bînin. Ne wisa be wê dewleta Tirk a dagirker her tim êrişî herêmên me bike."

Di çalakiyê de Hevserokê Meclisa TEV-DEM a Qamişlo Ayîd Îbrahîm îşaret pê kir ku çeteyên dewleta Tirk a dagirker di bin navê ola îslamê de cûdahiyê di navbera gel û olan de çêdikin. Lê li Bakur û Rojhilatê Sûriyê nikarin biratiya gelan û îradeya wan têk bibe.

Îbrahîm di dawiya axaftina xwe de ji bo ewlehî û aştyia gelan banga xurtkirina têkoşînê kir.

Çalakî dewam dike.

ANHA