Koçberên Girê Spî bang kir: Plana guhertina demografiya herêmên me rawestînin!

Îro bi sedan koçberên Girê Spî li qada Kampa Koçberên Girê Spî kom bûn û siyasetên dewleta Tirk yên guhertina demografiya herêmên wan şermezar kirin. Rûspiyên kantona Girê Spî, nûnerên Partiya Sûriya Pêşerojê û koçberên kampê tev li çalakiyê bûn.

Koçberê bi navê Salih El-Hecî daxuyanî xwend û tê de plana dewleta Tirk a dagirker a bicihkirina penaberên sûrî li herêmên Sûriyê yên dagirkirî û guhertina wan herêman, şermezar kir.

Her wiha hat diyarkirin ku dewleta Tirk bi vê yekê armanc dike fitneyê di navbera sûriyan de derxîne û bang li penaberan hat kirin ku bi vê planê neyên xapandin.

Di daxuyaniyê de îşaret pê hat kirin ku ev plan berovajî propagandaya dewleta Tirk, alzoiya Sûriyê dirêjtir dike û tu çareseriyan peyda nake.

Di dawiya daxuyaniyê de bang li civata navneteweyî û Komkara Erebî hat kirin ku destwerdan bikin û vê plana mêtînger rawestînin, alîkariyê nedin dewleta Tirk û hate gotin: “Armanca vê planê parçekirina Sûriyê û derxistina fitneyê di navbera sûriyan de ye.”

Rêxistinê Mafên Mirovan a Efrîn-Sûriyê di 14`ê Gulanê de, dersînorkirina komeke penaberên sûrî yên li Tirkiyê bi rêya dergehê Girê Spî yê sînorî û şandina wan ber bi Sûriyê ve, belge kiribû.

Hêjayî bibîrxistinê ye ku piştî dagirkirina kantona Girê Spî ji aliyê dewleta Tirk û çeteyên wê ve di 9`ê Cotmeha 2019`an de, zêdetirî 100 hezar welatiyên kantonê û gundewarê wê bi darê zorê hatin koçberkirin. Ji wan 6 hezar û 43 koçber li Kampa Koçberên Girê Spî bi cih dibin, yên din jî li bajarên Reqa û Tebqa û gundewarên wan bi cih dibin û di nav şert û mercên dijwar de dijîn.

(şx)

ANHA