Desteya Çandiniyê ya Aborî ya Herêma Efrînê ji bo mewsimê çandiniyê tedbîr girtin

Wekî her salê dema mewsimê çinîna genim û ceh nêzîk dibe, artêşa Tirk û çeteyên wê zeviyan gulebaran dike.

Artêşa Tirk a dagirker û çeteyên wê 9`ê mehê êrişên berfireh li dijî gundên nêzî eniyên şer pêk anîn, gundewarê Babê û gundên navçeya Şêrawa ya kantona Efrînê kirin. Di encamê de rûbereke mezin ji erdên gundên Um El-Hoş a navçeya Ehresê hate şewitandin.

Bi armanca pêşîlêgirtina bûyerên şewatê li kantona Şehbayê, "Komîteya Şewatan" hate avakirin û ji gelek saziyên heman peywendiyê pêk tê. Ji wan Desteya Çandiniyê ya Herêma Efrîn, Desteya Şaredariyan û ji bo navçeyên kantonê jî ambulans hatin diyarkirin.

Der barê mijarê de hevserokê Beşa Kar û Barên Çandiyê ya Desteya Aborî û Çandiniyê ya Herêma Efrînê de Basim Osman ji ANHA`yê re axivî.

'MEWSIM NE BAŞ E Û SIYASETA BIRÇÎKIRINA ŞÊNIYÊN HERÊMÊ BERDEWAM DIKE'

Osman îşaret bi mewsima 2022`an kir û got: "Ji ber hişkesaliyê mewsim ne baş e, nexasim gerim û ceh. Genimê bejî di halê hazir de ne baş e û yê avî jî heta astekê baş e."

Osman diyar kir ku ambargoyê bandoreke mezin li hilberînê kir û wiha axaftina xwe domand: "Ji ber ku hemû rê hatin girtin û saktorên çandiniyê derbasî herêmê nebûn. Mînak mazot û semad li herêmê tune ye û bûyerên şewatê jî dubare dibin. "

Osman da zanîn ku mewsima 2022`an nêzîk e û ji ber topbarana artêşa Tirk û çeteyên wê li ser hilberînên gundên nêzî eniyên şer, agir bi genim û cehê ket bi taybet gundên Gol Sirûc û Um El-Hoş.

Der barê pêşîlêgirtina bûyerên şewatê de Osman wiha axivî: "Têkildarî bûyerên şewatê komîteyek ji saziyên bajêr hate avakirin û alavên pêwîst hatin diyarkirin. Ev komîte amade ye bi şev û roj deveran kontrol bikin da ku rê li pêşiya şewatê bigirin."

Osman diyar kir ku genim ji hilberînên sereke yê herêmê ye û ambargo bandore lê dike, nexasim bi ziwabûna herêmê re.

Osman da zanîn ku bi destpêkirina mewsima par re ji ber topbaranaa û gulebarana ji aliyê artêşa Tirk ve rûberên mezin şewitîn, armanc jê jî ew bû ku vîna gel bişkîne û siyaseta birçîkirinê pêk bîne.

'LI DIJÎ ŞEHBAYÊ SIYASETÊN HEVBEŞ HENE'

Hevseroka Meclisa Kantona Efrînê Zelûx Bekir axivî û got, li dijî Şehbayê siyasetên hevbeş di navbera hikumeta Şamê û artêşa Tirk de hene û diyar kir ku ev siyasetên wan nehatine guhartin û rojane gundên Şehba û navçeya Şêrawayê topbaran dikin.

Zelûx Bekir diyar kir ku êriş li pêşberî çavên her kesî têne kirin, hikumeta Şamê ambargo ferz dike û li dijî koçberan siyaseta birçîkirinê dide meşandin, her wiha artêşa Tirk û çeteyên wê jî êrişî kantonê dike.

Zelûx anî ziman ku siyasetên artêşa Tirk û hikumeta Şamê di çarçoveya şikandina koçberên Efrînê de pêk tê.

'TEVÎ HEMÛ HEWLDANAN  BERXWEDAN BERDEWAM E'

Zelûx Bekir bêdengiya civata navneteweyî ya li hemberî kiriyarên dewleta Tirk û ambargoya hikumeta Şamê şermezar kir. Her wiha bang li hikumeta Şamê kir ku rewşa şêniyên Efrînê wekî welatiyên sûrî bide berçavan, ji ber ku ji mafên wan azad bijîn û bi awayekî ewle vegerin warên xwe.

Di dawiyê de Zelûx Bekir destnîşan kir ku ew ê heta vegera li Efrînê li ber xwe bidin.

(eh)

ANHA