Li Hesekê 15'ê Gulanê hat pîrozkirin

Di şahiyê de  mamosetên zimanê kurdî, nûnerên saziyên civaka sivîl, saziyên Rêvebriya Xweser, partiyên siyasî û şandeyek ji Desteya Perwerde û Fêrkirinê ya Rêveberiya Xweser amade bûn.

Şahî bi rêzgirtinê dest pê kir, piştre berdevkê Komîteya Giştî ya Dibistanên Kantona Hesekê Malik Elî axivî û Roja Zimanê Kurdî li tevahî gelê Kurd, rêber Abdullah Ocalan û mamosteyên ziman pîroz kir.

Malik Elî bal kişand ser siyasetên rejîmên dagirkerên Kurdistanê yên li dijî zimanê kurdî û rola şoreşa Rojava di vejandina ziman û çanda kurdî û got: "Zimanê me ji aliyê pergalên serdest ve hatibû qedexekirin, em ji mafên hînbûna bi zimanê xwe bêpar hatibûn hiştin. Lê îro bi saya zorokên agir û rojê em bi zimanê xwe yê dayikê diaxivin û fêr dibin. Em êdî dîroka xwe bi zimanê xwe dinivsînin."

Endamê Komîteya Zimanê Kurdî ya bajarê Hesekê Dilsoz Îbrahîm jî bal kişand ser siyasetên rejîma Baas û hewildanên wê pişaftina çanda gelê Kurd bi rêya qedexekirina perwerde bi zimanê kurdî.

Dilsoz Îbrahîm anî ziman ku ku ziman hebûn û nasnameya gelan e, bê ziman hebûna gelan bi dawî  dibe.

Paşê Koma Celadet Bedirxan a girêdayî navenda Çand û Hunerê ya Hesekê, şanoyek  li ser zehmetiyên ku rewşenbîr û lêkolînerên kurdan li ser destê dagirkerên Kurdistanê kişandine pêşkêş kirin.

Di dawiyê de her du helbestvanên Kurd, Ferhad Merdê û Hozan Girkundî çend helbest gotin, Koma Tolhildan jî çend stranên folklorî gotin.

(şt)

ANHA