‛Armanca projeya vegerandina penaberan sirgûnkirina Kurdan e‛

Hevserokê Nivîsgeha Têkiliyên Siyasî ya Partiya Yekitiya Demokratîk (PYD) şaxê herêma Firatê Bekir Hec Îsa der barê êrişên dewleta Tirk a dagirker ên li dijî Bakur û Rojhilatê Sûriyê be û projeya bicihkirina zêdetirî milyonek penaberên sûrî li herêmên dagirkirî yên Bakur û Rojhilatê Sûriyê de axivî.

‛ÊRIŞ BI PROJEYA NIŞTECIHBÛNÊ VE GIRÊDAYÎ NE’

Bekir Hec Îsa ji ajansa me re wiha got: "Êrişên ku artêşa Tirk a dagirker li dijî Bakur û Rojhilatê Sûriyê Sûriyê pêk tîne, bi projeya niştecihbûnê ve girêdayî ne. Ew proje li dijî kurdan a herî xeternak e heta ji siyasetên Partiya Baasê jî xeternaktir e."

Hec îsa wiha domand: "Em bi vegera milyonek penaberên sûrî re ne, lê belê ne ku vegerin herêmên din. Divê vegerin malên xwe û herêmên jê koçber bûne. Divê sûrî nebin qurbanên fikrên rayedarên tirkan û baş bizanin ku xwediyên rastîn ên malan dê rojekê lê vegerin."

‛PENABERÊN SÛRÎ QURBANÊ SIYASETÊN TIRKIYÊ NE’

Bekir Hec Îsa diyar kir ku dewleta Tirk a faşîst penbarên sûrî yên li Tirkiyê bi kar tîne û wiha pê de çû: "Ji destpêka krîza Sûriyê ve hikumeta Tirk a faşîst vê planê pêk tîne. Penaberên sûrî weke belgeyekê ji bo pêkanîna berjewendî û armancên xwe yên şexsî bi kar tîne. Ev tişt ji destpêka krîza Sûriyê heta roja îro ve eşkere ye. Em şoq dimînin, çawa gelê Tirkiyê û penaberên sûrî bi van planan tên xapandin."

Hec Îsa destnîşan kir ku hikumeta Tirkiyê bi vegera hin penaberan re gelek armancan pêk tîne û ev tişt anî ziman: "Ji aliyekî ve dewleta Tirk şerê tayîfî di navbera sûriyan de çêdike û ji aliyekî din ve dengê gelê Tirkiyê qezenc dike. Ji bo dewleta Tirk qezenckirina dengê gelê Tirkiyê girîng e. Ji bo me jî weke Kurd, me ji sînorê di navbera Rojava û Bakurê Kurdistanê de sirgûn dike."

Hevserokê Nivîsgeha Têkiliyên Siyasî ya PYD’ê şaxê herêma Firatê Bekir Hec Îsa bang li partiyên siyasî kir ku neyên lîstokên fikrên berpirsên tirkan û li kêlek gelê xwe bin û wiha got: "Dema hatiye ku baş bê zanîn ku dewleta Tirk a dagirker ne tenê şerê partiyekî dike, lê belê şerê gel tevahî dike. Tiştê li Efrîn û herêmên dagikirî pêk tên, nîşaneya vê yekê ne."

Hec Îsa da zanîn ku guhartina demografiya herêmên dagirkirî, revandin, talankirin û dizînê li pêş cîhanê têne kirin.

Bekir Hec Îsa di dawiyê de û got: "Ev serdem lawzan qebûl nake. Gelê me bi hêza xwe li hember çi êrişan xwe îsbat kir."

(fr)

ANHA