​​​​​​​Şêniyên Minbicê: Çiqas êriş zêde bibin em dev ji axa xwe bernadin

Gundên Ereb Hesen, Mihsenlî, Seyada, Ewn Dedet, Cat û Hûşeriyê yên rojava û bakurê bajarê Minbicê rojane ji aliyê artêşa Tirk a dagirker û çeteyên wê ve tên topbarankirin.

Şêniyên van gundan ji ANHA'yê re axivîn û diyar kirin ew ê li hemberî van êrişan li ber xwe bidin û warê xwe biparêzin.

' EM DEV JI AXA XWE BERNADIN'

Welatiyê bi navê Îbrahîm El- Ehmed (63) got: "Dewleta Tirk a dagirker û çeteyên wê rojane gundên me topbaran dikin. Bê rehm top û guleyan wekî baranê li ser me dibarinin. Va em li malên xwe û li ser xaka xwe ne."

Îbrahîm El- Ehmed diyar kir ku her çiqas êriş li ser wan zêde bibin, dev ji xaka xwe bernadin û wiha domand: "Ji ber êrişên bêserûber ên li ser gundên me zarokên me ditirsin. Her çiqas êrişên dewleta Tirk a dagirker li ser herêmên me zêde bibin em dev ji gund û xaka xwe bernadin. Ev xak bi xwîna şehîdan hatiye rizgarkirin, em tu carî wê terik nakin."

Îbrahîm El- Ehmed anî ziman ku ew nikarin dûrî axa xwe bijîn û çiqas dijmin û banga derxistina dewleta Tirk û çeteyên wê ji herêmê dagirkirî kir.

' AXA ME BÛYE BEYAR '

Welatiyê bi navê Ebusetar Hac Hisên (55) diyar kir ku rojane rizqên wan tên topbarankirin û got: "Gunehê me ev e ku em li ser axa xwe û li malên xwe di nav ewlehiyê de dijîn!. Armanc ji van êrişan ew e ku me ji mal û warê me koçber bikin û dest deynin ser xaka me."

Hac Hisên her wiha da zanîn ku dewleta Tirk di êrişên xwe de sivîlan dike hedef û dixwaze xeyalê osmaniyan li herêmê zindî bike û sûcên xwe li dijî gelan zêde bike.

Hac Hisên diyar kir ku li aliyê din ê xeta Sacûr a li gundewarê bakurê Eyn Îsayê, li kêleka eniyên şer, nêzî 60 hektar zeviyên çandiniyê yên wî hene û bi salan e bûye çol, ji ber ku çete rê nedane wî ku çandiniyê bike.

Ebdusetar Hac Hisên di dawiya axaftinaxwe de got, çiqas dewleta Tirk a dagirker û çeteyên wê êrişên xwe zêde bike, ew dev ji axa xwe bernadin.

Welatiya bi navê Sîham Hemo ji bajarê Minbicê got armanc ji êrişên domdar ên dewleta Tirk ên li ser Bakur û Rojhilatê Sûriyê, şikandina îrade û israra gelê herêmê û têkbirina projeya neteweya demokratîk e.

Sîham Hemo îşaret pê kir ku dewleta Tirk a dagirker hewl dide ewlehî û istiqrara herêmê ku hemû pêkhate bi hev re dijîn, têk bibe û wiha pê de çû: "Dewleta Tirk a dagirker bi hinceta parastina ewlehiya xwe ya neteweyî sûcan pêk tîne û destwerdanê li welatên cîran dike. "

Sîham Hemo di dawiya axaftina xwe de bang li civaka navneteweyî û rêxistinên mafên mirovan kir ku helwesta xwe li hemberî sûcên dewleta Tirk nîşan bide.

Welatiyê bi navê Ebdulhenan Hisên got, divê dewleta Tirk ji ber van binpêkirinan were muhasebekirin.

Ebdulhenan Hisên wiha lê zêde kir: "Gelê Bakur û Rojhilatê Sûriyê bi saya xwîna şehîdan ku herêm ji terorê rizgar kirine, di nav ewlehî û aramiyê de dijîn, lê dewleta Tirk bi êrişên xwe ewlehî û aramiya wê têk dibe. Dawiya dawî wê dagirker têk biçin."

Welatiya bi navê Hîba El- Ehmed got: "Dewleta Tirka dagirker û çeteyên wê li dijî gelên Bakur û Rojhilatê Sûriyê hemû sûc û binpêkirinan dike û ji bîr kirine ku herêm bi saya xwîna şehîdên wan hatine rizgarkirin."

Hîba El- Ehmed her wiha bêdengiya civaka navneteweyî ya li sûcên dewleta Tirk a dagirker û çeteyên wê şermezar kir.

(dx)

ANHA

<iframe width="560" height="315" src="https://www.youtube.com/embed/IxOWvG2zXSw" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>