Li Hesekê pîrozbahiya 1'ê Gulanê

Bi diruşma "Bi têkoşîna 1'ê Gulanê em berxwedana gelan silav dikin", Yekitiya Kedkaran a TEV-DEM'ê şahiyek li qada Suryan a taxa Nasira ya bajarê Hesekê li dar xist. Bi sedan kes tev li şahiyê bûn.

Qada şahiyê bi wêneyên rêber Abdullah Ocalan, alên TEV-DEM û Yekitiya Kedkaran a Bakur û Rojhilatê Sûriyê û pankartên "Bijî 1'ê Gulanê" û "Xebata jinan bi nirx e şoreşê mezin dike" hate xemilandin.

Şahî bi rêzgirtinê dest pê kir. Paşê hevserokê Yekitiya Kedkaran a Kantona Hesekê Kemal Elî daxuyaniya yekitiyê xwend.

Di daxuyaniyê de hate gotin: "Bi rih û têkoşîna 1'ê Gulanê em tevahî kedkarên Bakur û Rojhilatê Sûriyê bi vê roja dîrokî ya cîhanî, roja îrade û sekna lehengane ya li hemû zulm, înkarkirin, zihniyeta desthilatdar silav dikin.

Em ji bo jiyaneke bi rumet, başkirina rewşa jiyanî, mercên xebatê û parastina destkeftiyên civakî, ji bo avakirina civakeke demokratîk û azadî kar dikin."

Di daxuyaniyê de berxwedana gerîlayan a li hemberî dewleta Tirk a dagirker hate silavkirin û wiha hat domandin: "Em li Bakur û Rojhilatê Sûriyê bi rihê serkeftina 1'ê Gulanê em ê asta têkoşînê bilind bikin heta ku serkeftinê misoger bikin û bi rihê 1'ê Gulanê berxwedana gelan pîroz dikin."

Piştre hevserokê TEV-DEM'ê Xerîb Hiso axivî, ev roj li tevahî karkerên cîhanê pîroz kir û têkoşîna wan a li hember zilm, înkarkirin û desthilatdariyê silav kir.

Hiso anî ziman ku dewleta Tirk a dagirker hîna mafên karkeran înkar dike, li Tirkiyê karker di girtîgehan de û rewşa wan ne baş e.

Endama Koordînasyona Kongra Star Welîda Botî jî diyar ki ku pergalên kapîtalîst mafên karkeran diçewisîne û wan bi kar tîne, dema ku mafên xwe  yên rewa dixwazin şerê wan dike.

Welîda Botî bal kişand ser êrişên dewleta Tirk ên li ser PKK'ê û got: "Dewleta Tirk êrişî PKK'ê ya ku gelên Kurdistanê diparêze, dike da ku îradeya gelên azad têk bibe."

Di şahiyê de PYD'ê plaket diyarî Yekitiya Kedkaran a Kantona Hesekê kir.

Di dawiyê de li ber stamen Koma Tolhildan xelek hatin gerandin.

ANHA