Li Minbicê şehîdên Qereçoxê hatin bibîranîn

Şêniyên bajarê Minbicê bi boneya Cejna Şehîdan, şehîdên Qereçox û şehîdên bajêr bi bîr anîn û mûm li ser gorên şehîdan ên li goristana şehîdan a li aliyê başûrê bajêr, pêxistin.

NÛÇE

25 nîsan, 2022 20:11

MINBIC

Şêniyên Minbic, endamên saziyên sivîl, leşkerî û partiyên siyasî beşdarî merasîma bîranînê bûn.

Di merasîmê de hevserokê Meclisa Malbatên Şehîdan a Minbicê Rebîh Izedîn wiha axivî: "Em şehîdên xwe ne tenê di cejna wan de bi bîr tînin. Ew her tim di dilê me de ne û rojên me hemû cejnên şehîdan e. Ji ber şehadet xwedî nirxekî mezin e û em çi bikin lê em ê deyndarên wan bin."

Piştre Hevseroka Meclisa Rêveber a Minbicê Nazîfe Xelo jî ev tişt anî ziman: "Îro Cejna Şehîdan e ku berhema fedakariyên şehîdan in da ku em di nav ewlehî û istiqrarê de ne. Em şehîdên komkujiya Qereçoxê jî bîr nakin. Pêwîstiya her welatekî bi berdêlan heye. Me jî bi hezeran şehîd dan da ku em bi aramî û ewlehî bijîn."

Her wiha Hevserokê Komîteya Kar û Barên Civakî ya Rêveberiya Xweser Farûq El-Maşî jî Cejna Şehîdan li malbatên şehîdan pîroz kir û soza şopandina rêya wan da.

Di dawiyê de mûm li ser gorên şehîdan hatin pêxistin.

(bx)

ANHA