Şehîd Dilar Heleb hate oxirkirin

Şervana YPJ'ê Ranya Henan (Dilar Heleb), tev du hevalên xwe Rodîn Ebdilqadir Mihemed (Ronahî Kobanê), Cihan Nidal Elî (Kobanî) 20`ê Nîsanê di encama bomberana balafireke bê mirov a dagirker a li ser başûrê Kobanê şehîd bûn.  Cenazeyê Ronahî Kobanê û  Cîhan Nîdal Elî roja Pêncşemê li goristana Şehîd Dicle ya Kobanê hatin veşartin û cenazeyê şehîd Dilar Heleb ber bi Helebê ve hate rêkirin.

Bi sedan şêniyên taxên Şêxmeqûd û Eşrefiyê, şervanên YPG, YPJ û Hêzên Ewlekariya Hundirîn bi merasîmeke girseyî cenazeyê şehîd Dilar Heleb li goristana Şehîdan a Ii gundê Bino yê herêma Şiqêf spartin axê.

Şêniyan ji pêşiya hola civînan a li aliyê rojavayê taxa Şêxmeqsûd kom bûn û bi berizkirina diruşmeyên "Şehîd Namirin" ber bi goristana şehîdan a li gundê Bino ve çûn.

Li goristanê merasîm bi rêzgirtin dest pê kir, her wiha toreneke leşkerî ji aliyê YPJ û YPG`ê ve hate lidarxistin. Paşê ji fermandarên YPJ`ê Rêvîn Cûdî wiha axivî: "Şehîd Dilar ji bo parastina gel û welatê xwe tev li nava YPJ`ê bû. Hemû jiyana xwe kiribû xizmeta doza Kurdî de."

Rêvîn Cûdî  diyar kir ku şehîd Dilar bi rihê xwe yê berxwedêr cihê xwe di dilê gel, heval û dostên xwe de çêkir, bi vîn û israreke xurt têkoşîna xwe dewam kir û di her qadan de xwe îsbat kir.

Rêvîn Cûdî  bal kişand ser êrişa dewleta Tirk a dagirker a li ser Kobanê û wiha domand: "Dewleta Tirk ji hêza jinê û serkeftinên ku bi dest xistine, ditirse û wekî xeteriyekê li ser zihniyeta xwe dibîne."

Fermandara YPJ'ê Rêvîn Cûdî soza şopandina têkoşînê heta pêkanîna armancên şehîdan da.

Bi navê Meclisa Malbatên Şehîdan jî Rewşan Mihemed destnîşan kir ku şehîdan ji bo gel bi azadî û rûmet bijîn her tiştî feda dikin û wiha pêde çû: "Xaka me bi xwîna şehîdan hatiye avdan û ev yek jî girêdana me bi welatê me ve zêde dike."

Rewşan Mihemed di axaftina xwe de peyamek ji PDK`ê re şand û wiha got: "Divê PDK`ê ji xewa xwe şiyar bibe. Divê dev ji xeta îxanetê berde û di vî şerî de bi birayên xwe yên Kurd re bisekine."

Bi navê malbata şehîd Dilar Heleb jî, Osman Şêx Îs got: "Ji bo gelên ku dixwazin bi rûmet, şehadet tiştekî pîroz e."

Piştre wesîqeta şehîd Dilar Heleb ji aliyê endama KPC-Demokratîk Zekiya Mistefa ve hate xwendin û radestî malbata wê hate kirin. Di dawiyê de cenazeyê şehîd di nava dirûşmeyên 'Şehîd namirin' û tilîliyên dayikan de li goristana Şehîdan a li gundê Bino hate veşartin.

(bx)

ANHA