​​​​​​​Şêniyên Dirbêsiyê li dijî xiyaneta PDK`ê piştgiriya xwe ji bo gerîla nîşan da

Piştî 3 rojan ji hevdîtina serokê hikumeta Başûrê Kurdistanê Mesrûr Barzanî û serokkomarê dewleta Tirk a dagirker Recep Tayyîp Erdogan, artêşa Tirk li dijî Hêzên Parstina Gel (HPG) û gelê Kurd êrişên nû dan destpêkirin. Hemwextî vê yekê Partiya Demokrat a Kurdistanê (PDK) hêzên xwe ber bi Herêmên Parastinê yên Medyayê ve şandin da ku di êrişên li dijî gerîla de piştgiriya artêşa dagirker bikin.

'DÎROKA VÊ PARTIYÊ TIJÎ XIYANET E'

Têkildarî mijarê welatiyê bi navê Ednan Mihemed anî ziman ku hevpeymana di navbera PDK`ê û dewleta Tirk a dagirker de ya li djî gerîla ne gaveke nû ye, lê belê dîroka wê tijî xiyanet û hevkariya bi dewleta Tirk a dagirker re ye ku rojane li dijî gelê Kurdistanê sûcan pêk tîne.

Mihemed got: “Gerîla tevî ku xwedî çekên sivik in, lê her tim serkeftin para wan e, lewma dewleta Tirk a dagirker planan datîne û bi hemû rêbazan hewl dide PKK`ê tune bike. Li aliyekî din jî PDK`ê ji bo pêkanîna berjewendiyên xwe û tunekirina dîroka Kurdan bi kar tîne.”

Mihemed wiha dawî li gotina xwe anî: "Gerîla gelê Kurd diparêze û yekane hêza parastina yekitiya Kurd, maf û armancên wan e. Lewma divê PDK ji planên dewleta Tirk a dagirker ên li dijî gelê Kurd dûr bikeve û bi Kurdan re hevkar be, her wiha rê nede dewleta Tirk a dagirker ku fitneyan li herêmê derxe.”

Welatiyê bi navê Cîhan Mihemed jî hevdîtinên PDK`ê û dewleta Tirk a dagirker şermezar kirin û got: "Senaryoya salên 1990`î berdewam dikin ku PDK`ê li kêleka dagirkeriya Tirk li dijî gerîla şer kir."

'EM SIYASETÊN KU HÊZÊN ME YÊN LI ÇIYAYAN DIKIN HEDEF QEBÛL NAKIN'

Cîhan Mihemed îşaret bi xiyaneta PDK`ê kir û wiha axivî: "Tişta jê re girîng e berjewendî û ajandeyên wê ne, ne berjewendiyên gelê Kurd in. Divê gelê Kurd li dijî van planan bisekine û bixebite."

Welatiyê bi navê Ehmed Mehmûd jî got: "Em siyasetên ku gelê Kurd û hêzên me yên li çiyayan dikin armanc, qebûl nakin. Ev hewldanên artêşa Tirk a dagirker û PDK`ê ne ku dixwazin vîna hêzên me û gelê me bişikînin."

Ehmed Mehmûd anî ziman ku PDK`ê hêzên xwe şandin Herêmên Parastinê yên Medyayê da ku li dijî gerîla piştgiriya artêşa Tirk a dagirker bikin, ev jî tê wateya xiyaneta li dijî Kurdan û wiha gotina xwe bi dawî kir: "Divê PDK li helwesta xwe vegere û dûrî van planan bikeve. Li aliyekî din jî divê gelê Kurd û bi taybet ên li Başûrê Kurdistanê li dijî van siyasetan bisekine û li dijî dagirkerên xaka Kurdistanê têkoşîn û berxwedanê dewam bikin."

(eh)

ANHA