Ji bo bîranîna şehîdên Pêngava Gurzê Gelan 121 dar hatin çandin

Meclisa Malbatên Şehîdan a Tebqayê bi hevkariya Partiya Kesk a Kurdistanê, îro hemleya çandina daran organîze kir û ji bo bîranîna şehîdên Pêngava Gurzê Gelan 121 dar li goristana şehîdan a li bajêr hatin çandin.

NÛÇE

16 nîsan, 2022 11:31

TEBQA

Endamên Partiya Kesk a Kurdistanê, endamên Nivîsgeha Kombûna Jinan a Zenûbiya ya Tebqayê, malbatên şehîdan ên Tebqayê û bavê şehîd Ezîz Ereb Hisên Şêx Hesen tev li hemleya çandina daran bûn.

Beşdarên hemleyê ji bo bîranîna şehîdên Pêngava Gurzê Gelan, 121 şitil li goristana şehîdan çandin.

20`ê Çileya derbasbûyî çeteyên DAIŞ`ê êrişî girtîgeha Sînaa ya taxa Xiwêran a Hesekê kiribû û di Pêngava Gurzê Gelan de 121 sivîl û şervan şehîd bûbûn.

BAVÊ ŞEHÎD EZÎZ EREB JÎ TEV LI HEMLEYÊ BÛ

Hêjayî bibîrxistinê ye ku şehîd Ezîz Ereb (Nadir Şêx Hesen) ji gundê Meryemînê yê kantona Efrînê ye û sala 1983`yan tev li refên gerîlayan bûbû. Ezîz Ereb 17`ê Nîsana 1986`an şehîd bû. Her wiha di hemleya çandina daran a îro de bavê şehîd Ezîz Ereb jî amade bû.

Li Rojavayê Kurdistanê Ezîz Ereb yekemîn şehîdê ji pêkhateya Ereb e ku tev li tevgera rizgariya Kurdistanê bûye.

(eh)

ANHA