Şêniyên herêma Cizîrê lêkirina dîwarê ‘îxanetê’ şermezar kir

Vê sibehê bi sedan şêniyên Hesekê û şêniyên kantona Qamişloyê berê xwe da herêma sînorî ku hikumeta Mistefa Kazimî ya Iraqê li wir di navbera Şengal û Rojava de dîwar lê dike.

Beşdarên çalakiyê wêneyên rêber Abdullah Ocalan, alên PYD`ê, Kongra Star, Mala Êzidiyan û YJŞ`ê rakirin û dirûşmên li dijî xiyaneta malbata Barzanî berz kirin.

Dema ku şênî gihîştin herêma di navbrea qezeya Şengalê û navçeya Holê de ku bi dîwar hatiye girtin, mîtîngê dest pê kir. Li wir hevseroka Partiya Yekitiya Demokratîk (PYD) li kantona Hesekê Samiye Fereh daxuyaniyek bi zimanê erebî xwend û hevserokê PYD`ê şaxa kantona Qamişlo Mesûd Dawûd jî daxuyanî bi zimanê kurdî xwend.

Di destpêka daxuyaniyê de behsa peymana 9`ê Cotmeha 2020`an hat kirin û hat gotin: “Armanca wê peymanê tunekirina Rêveberiya Xweser a Şengalê bû.”

Di daxuyaniyê de hate bibîrxistin ku 3 armancên lêkirina dîwar hene û wiha dewam kir: “Ya yekemîn hedefgirtina Şengalê û îradeya gelê wê. Ya duyemîn meşandina terora aborî û siyasî li dijî Bakur û Rojhilatê Sûriyê. Ya sêyemîn jî derbkirina Herêmên Parastinê yên Medyayê ye.”

Di daxuyaniyê de hate destnîşankirin ku ev dîwar bi lihevkirina PDK’ê û hikumeta Iraqê bi perspektîfa dewleta Tirk a faşîst tê lêkirin û bi dîwarê “îxanetê” hate binavkirin.

Di dawiya daxuyaniyê de lêkirina dîwar hate şermezarkirin û hate gotin: “Ev kiryareke faşîst e ku hikumeta Iraqê û PDK bi fermana dewleta Tirk a faşîst pêk tînin. Ev dîwar goristana gelan e, ji ber ku hemû pêkhateyên Şengalê dike hedef û Bakur û Rojhilatê Sûriyê difetisîne.”

(cx)