Şêniyên Hesekê rojbûna 73`yan a rêber Ocalan pîroz kir

Saziyên civaka sivîl û leşkerî li bajar û navçeyên kantona Hesekê bi boneya 4`ê Nîsanê ku rojbûna rêber Abdullah Ocalan e, çalakiyên cuda li dar xistin.

Şahiyên li Hesekê, Dirbêsiyê û Şedadê, bi beşdariya endamên Kongra Star, nûnerên Rêveberiya Xweser a Demokratîk a Herêma Cizîrê, şênî û hêzên leşkerî hatin lidarxistin.

AKADEMIYA KOÇBERÊN SERÊKANIYÊ

Bi heman boneyê Komîteya Perwerdeyê ya Akademiya Civaka Demokratîk li kampa Serêkaniyê akademiyek bi navê Akademiya Şehîd Ebûd Mihemed vekir.

Bi dehan endamên meclisa kampê û şêniyên wê tev li merasîma vekirina akademiyê bûn. Endamê rêveber ê Partiya Yekitiya Demokratîk (PYD) Ebdulxenî Oso di merasîmê de axivî û îşaret bi girîngiya akademiyan kir. Her wiha girîngiya vekirina vê akademiya di rojbûna rêber Abdullah Ocalan de şîrove kir û got: "Rêber Ocalan girîngiyeke mezin dida perwerdeyê."

120 ŞITIL LI QADA AKADEMIYA ÎSLAMA DEMOKRATÎK HATIN ÇANDIN

Bi heman boneyê Kongra Îslamî ya Demokratîk 120 darên zeytûnan û senober li qada akademiyê çandin. Endamên Fakulteya Zanistên Olî û Akademiya Selam a Hesekê tev li çandina şitilan bûn.

LI HESEKÊ ŞAHIYEK JI BO ZAROKÊN ŞEHÎDAN LI DAR KET

Saziya Malbatên Şehîdan bi hevkariya fermandariya QSD`ê ya herêma Cizîrê şahiyek ji zarokên şehîdan re li dar xist. Bi dehan şervan û malbatên şehîdan ên bajêr tev li şahiya Hesekê bûn.

Hevseroka Meclisa Leşkerî ya Herêma Cizîrê Evînar Dêrik axivî û rojbûna rêber Abdullah Ocalan pîroz kir.

Piştre endama Saziya Dayikên Aştiyê ya Bajarê Hesekê Siltanê Ehmed axivî û got rojbûna rêber Ocalan roja hilatina azadiya gelan e.

Di dawiya şahiyê de Koma Navenda Xabûr a Çand û Hunerê ya Hesekê stran, şano û govend pêşkêş kirin.

LI JINWARÊ 100 ŞITIL HATIN ÇANDIN

Bi boneya rojbûna rêber Abdullah Ocalan li gundê Jinwar ê navçeya Dirbêsiyê ya kantona Hesekê, 100 şitil hatin çandin.

LI ŞEDADÊ NAVENDA HPC’Ê HATE VEKIRIN

Şêniyên Şedadê bi heman boneyê navenda Hêzên Parastina Civakî (HPC) ya bi navê ‘Navenda Şehîd Hesen Elî El-Horî’ vekir û li baxçeyê navendê û li navçeyê şitil çandin. Di merasîma vekirinê de endama Kongra Star Intîsar Erîb axivî û rojbûna rêber Abdullah Ocalan pîroz kir.

Endama Navenda Parastina Civakî Efaf Hesekê jî axivî û got armanc ji vekirina akademiyê di vê rojê de pêkanîna daxwazên rêber Ocalan e ku her tim banga parastina civakê dike.

(eh)