Şêniyên Dêrikê li dijî hevkariya PDK'ê ya bi dewleta Tirk re meşiyan

Bi hezaran şêniyên navçeya Dêrikê û herêmên Koçerat û Beravê li qada Azadî kom bûn û ji bo şermezarkirina hevkariya PDK`ê bi dewleta Tirk re û bîranîna salvegera 76`an a damezirandina Komara Mehabadê meşiyan. Di dema meşê de hemû dikan hatin girtin.

Di meşê de diruşmeyên "Na ji xiyanetê re", "Bijî biratiya gelan", "Na ji şerê birakujiyê re" û "Dem dema yekitiya neteweyî ye" hatin berzkirin.

Meş li qada Şehîdan bi dawî bû û veguherî mîtîngê.

Di mîtîngê de, endamê Meclisa Malbatên Şehîdan a Dêrikê Mihemed Hiso axivî û got: “Gelê ku zarokên xwe dike qurban, serî ji xiyanetê re natewîne. Ji ber ku ji fikr û felsefeya rêber Abdullah Ocalan fêr dibe kesek nikare li pêşiya fedekariyên gelê me bisekine.” 

Hiso diyar kir ku ji dema damezirandina Komara Mehabatê û heta roja îro xeta xiyanetê dewam dike û bang li gelê Kurd kir ku li hemberî komplo û planên li dijî doza kurdî têne kirin, bisekinin.

Hiso hevkariya PDK`ê şermezar kir û berxwedana HPG`ê li hember dewleta Tirk a faşîst silav kir.

Li ser navê Dayikên Aştiyê, dayîka şehîd Hevrîn Xelef Suad Mistefa axivî û got: “Em dayikên aştiyê bang li gelê Kurd li her çar parçeyên Kurdistanê dikin ku li ser masaya diyalogê rûnin, bibin yek û li hember komplo û  planên li dijî gelê me û gelên herêmê li bisekinin.”

Sûda Mistefa wiha domand: “Dayikên Aştiyê komployên li dijî Şengal û Herêmên Parastinê yên Medyayê red dikin. Ji ber wê divê dayîkên şehîdan li hember xiyanetê bisekinin.”

Mîtîng bi diruşmeyên silavkirina berxwedana gerîla bi dawî bû.

(şx)

ANHA