Li Şehbayê salvegera damezirandina Partiya Sûriya Pêşerojê hate pîrozkirin

Bi boneya salvegera 4’an a damezrandinê ku dikeve 27’ê Adarê, Partiya Sûriya Pêşerojê şaxê Efrîn-Şehba şahiyek li hola Mîtan a navçeya Ehdas a kantona Şehbayê li dar xist.

Bi dehan endamên sazî, nûnerên partiyên siyasî û rûspiyên eşîrên herêmê beşdarî şahiyê bûn. Hol bi pankartên "Xwîna şehîdan menareya azadiyê ye", "Mafê vegere pîroz e", "Bi fikir û zanabûnê kesayeta partî ya rêxistinkirî ava dibe" û "Bi zend û israra ciwanan em ê dagirkeriyê têk bibin û Sûriyeke pêşerojê ava bikin" hate xemilandin.

Şahî bi deqeyeke rêzgirtinê dest pê kir, dûvre Serokê Meclisa Partiya Sûriya Pêşerojê şaxê Efrîn-Şehba Mihemed Beyrem geşedanên siyasî yên li Sûriyê û cîhanê bi giştî şîrove kirin.

Mihemed Beyrem got: "Siyasetên dewletên hegemon cîhan ber bi xwe ve kişand û piştî hilweşîna Yekitiya Sovyet cîhanê kontrol kir, her wiha destwerdan li Bihara Ereban û krîza Sûriyê kir ku êdî bûye qada destwerdanên hêzan li herêma Rojhilata Navîn."

Beyrem îşaret bi sûcên dagirkeriya Tirk ên li dijî Efrîna dagirkirî, siyasetên guhartina demografîk, qetilkirin, dizîn, wêrankirin û hilweşandina şûnwaran, kir.

Li dawiyê, Beyrem got çareseriya yekane ya bidawîkirina krîza Sûriyê yekitiya hemû pêkhateyên gelê Sûriyê û pêkanîna rêgeza demokrasiyê ye.

Piştî axaftinê, helbest li ser krîza Sûriyê, kantona Efrîn û xwişkbûna xwezaya wê hatin xwendin. Her wiha sînevîzyonek li ser têkoşîna şehîd Hevrîn Xelef di nava partiyê de hate pêşandan.

Piştre endamên partiya stranên bi zimanên erebî û kurdî gotin.

Di dawiyê de govend hatin gerandin.

(fr)

ANHA