Lîwa Şemal Demokratî ji bo rizgarkirina Efrînê bang kir

Bi boneya salvegera 4'emîn a dagirkirina Efrînê. Lîwa Şemal Demokratîk (Tugeya Bakur a Demokratîk) daxuyaniyek li navenda xwe ya li bajarê Reqayê da. Berdevkê lîwayê Mehmûd Hebîb daxuyanî xwend.

Di daxuyaniyê de hate got: "Mîna vê rojê dîmenê berxwedanê tê bîra me ku cîhanê matmayî hişt. Lehengên me 58 rojan li hemberî duyemîn mezintirîn artêşa di NATO'yê de û bi deh hazaran çete  sekinîn û windahiyên mezin ên canî û madî gihandin wan.

Ji ber vê yekê dijmin balafirên bê mirov û çekên pêşketî bi kar anîn. Di encamê de hevsengiyên leşkerî hatin guhertin. Ev hemû li pêşberî bêdengiya hikumeta Şamê û cîhanê  de hate kirin. Ji ber van êrişên hovane bi sed hazar şêniyên herêmê koçber bûn û mal û milkên wan hatin desteserkirin.

Dewleta Tirk a dagirker bi hevkariya xayînên ji artêşa niştimanî operasyonên çewisandina nasnameya çandî ya bajarê Efrînê pêk anîn, sembolên çandî û olî wêran kirin, gihaşt asta kolandina gorên şehîdan. Ev sûc bi hemû cûreyên wê dewam dike, bêyî ku hesab jê were xwestin.

Her çiqasî dewleta Tirk sûc û zulma xwe zêde bike, wê bangên daxwazên me nemirin. Wê Efrîn û Idlibê û tevahî herêmên dagirkirî birîneke kûr û deynek di stûyê me de be heta ku em ji dagirkeriyê paqij bikin. Em bang li kesên bi rûmet û gelê Sûriyê yê azadxwaz dikin ku li hemberî dagirkeriyê di rêzekî de bin, xaka xwe biparêzin û ji bo rizgarkirina wê bixebitin.

Di vê boneyê de em şehîdên azadiyê yên berxwedana Efrînê, bi taybet şehîdên hêzên Şemal Demokratî yên bi şehadeta xwe yekitiya gelan û pîroziya welat nîşan dane, bi bîr tînin.

Em bang li civata navneteweyî dikin ku dîlên li gel dewleta dagirker rizgar bikin û çarenûsa wan eşkere bike, her wiha biryarên civata navneteweyî yên di vê derbarê de aktîv bikin."

ANHA