Şehîd Reşo Qamişlo bi merasîmekê hate oxirkirin

Şêniyên Qamişlo cenazeyê şervanê QSD’ê Ehmed Mihemed (Reşo Qamişlo) li Goristana Şehîd Delîl Sarûxan veşart.

28 sibat, 2022 15:52

QAMIŞLO

Cenazeyê şervanê QSD'ê Ehmed Mihemed (Reşo Qamişlo) ê dema erka xwe bi cih dianî bi qezayekî şehîd bû, bi merasîmeke girseyî li Goristana Şehîd Delîl Sarûxan a bajarê Qamişlo hate veşartin.

Merasîm bi deqeyeke rêzgirtinê dest pê kir, dûvre endama Meclisa Malbatên Şehîdan a Qamişlo Şemsîxan Gulo sersaxiya malbata şehîd xwest û soza şopandina rêya şehîdan da.

Şemsîxan Gulo wiha domand: "Bi berxwedan û têkoşîna şehîdên azadiyê me gelek destkeftî ji Şoreşa Bakur û Rojhilatê Sûriyê re pêk anîn."

Li ser navê Meclisa Leşkerî ya Hesekê Nezîr Sofî soza berdewama rêça şehîdan heta serkeftina dawî da û ev tişt got: "Em hemû deyndarê şehîdên xwe ne û em ê têkoşîna ji bo wefedariya bi fedekariyên wan re berdewam bikin."

Piştî axaftin bi dawî bûn, endamê Meclisa Malbatên Şehîdan Revîn Şêxmûs wesîqeya şehîd Reşo Qamişlo xwend û radestî malbata şehîd kir.

Cenazeyê şehîd bi tilîliyên dayikan hate veşartin.

(fr)

ANHA