Şêniyên herêma Cizîrê banga radestkirina cenazeyên şehîdên kemîna Xelîfanê kir

Navenda Çapemenî û Ragihandinê ya Hêzên Parastina Gel (HPG) daxuyandibû ku hêzên PDK’ê di 28-29`ê Tebaxa 2021’an de kemînek daniye pêşiya komeke gerîla. Di encamê de 5 gerîla şehîd bûbûn û gerîlayek jî dîl hatibû girtin.

Bi armanca şermezarkirina xiyaneta PDK`ê û ji bo radestkirina cenazeyên şehîdan, Meclisa Malbatên Şehîdan a herêma Cizîrê 5`ê Cotmeha 2021`ê çalakiya konvedanê li deriyê sînor  ê Sêmalkayê dabû destpêkirin . Çalakiyê 111 rojan dewam kir. Piştre Komîteya Amadekar bi daxuyaniyekê ragihand ku ew ê çalakiyên cuda li dar bixin.

Îro li navçeya Tirbespiyê ya  kantona Qamişloyê bi deh hezaran şêniyên herêma Cizîrê daketin qadan. Xwepêşandêran siyasetên PDK`ê şermezar kirin û banga radestkirina cenazeyên şehîdên kemîna Xelîfanê kir.

Xwepêşandêr li pêşiya navenda Kongra Star a li Tirbespiyê kom bûn û wêneyên şehîdan û rêber Abdullah Ocalan rakirin.

Meş li têketina navçeyê rawestî û veguherî mîtîngê. Di mîtîngê de li ser navê Meclisa Malbatên Şehîdan a Herêma Cizîrê daxuyaniyek hate dayîn

Meclisa Malbatên Şehîdan di daxuyaniyê de wiha got: "Em hevkariya PDK`ê ya bi dewleta Tirk a dagirker û îstixbarata wê re şermezar dikin.”

Meclisê di daxuyaniya xwe de bang li gelê Başûrê Kurdistanê kir ku piştgiriya şoreşa azadiyê bikin, kiryarên PDK`ê û hevkariya wê bi Erdogan re eşkere bikin. Her wiha meclisê soza şopandina rêya şehîdan da.

Meclisê di daxuyaniya xwe de bang li civata navneteweyî û rêxistinên mafên mirovan kir ku ji bêdengiya xwe ya li hember Komploya Navneteweyî ya li dijî rêber Abdullah Ocalan jî derkevin û ev yek destnîşan kir: “Heta pêkanîna azadiya fîzîkî ya rêber Abdullah Ocalan û têkbirina xiyanetê em ê li qadan bin.”

(eh)

ANHA