Li Dêrikê pîrozbahiya Roja Zimanê Dayikê

Li Dêrikê bi boneya Roja Zimanê Dayikê ya Cîhanê, şahiyek hate lidarxistin.

NÛÇE

24 sibat, 2022 16:09

QAMIŞLO

Bi wesîleya Roja Zimanê Dayikê ya Cîhanê, Saziya Zimanê Kurdî ya Dêrikê şahiyek li Stada Kornîş a girtî li dar xist.

Mamoste, xwendekar û endamên saziyên sivîl beşdarî merasîmê bûn.

Şahî bi deqeyeke rêzgirtin dest pê kir. Ji rêveberên SZK'ê ya bajarê Qamişlo Viyan Cûdî axivî û got: "Gelê Kurd ji bo parastina ziman û nasnameya xwe berdêlên giran dan. Zimanê kurdî bi sedên salan ji aliyê dewletên faşîst ên dagirkerên Kurdistanê hatibû qedexekirin."

Viyan Cûdî anî ziman ku ziman nasnameya gelan e û nabe were înkarkirin û wiha pê de çû: "Tu kes nikare zimanê me qedexe bike ku hebûn û nasnameya me ye. Şoreşa Rojava çirûskek bû ku zimanê kurdî vejand."

Piştî axaftina Viyan Cûdî, helbest bi zimanê kurdî hatin xwendin. Koma Bargîn a girêdayî herêma Koçerat stranên flokolrî gotin. Li ber stranan govend hatin gerandin.

Her wiha pêşbireke çandî hate lidarxistin û diyarî hatin belavkirin.

ANHA