Li Kobanê bi hezaran dar hatin çandin

Pêngava çandina daran a ku ji aliyê Gerînendeya Jîngehê ya Herêma Firatê ve bi armanca avakirina daristanekê li Kobanê hatibû ragihandin, bi dawî bû.

Bi sedan endamên saziyên Rêveberiya Xweseriya Demokratîk a Herêma Firatê beşdarî pêngavê bûn ku 3 rojan dewam kir. Di çarçoveya pêngavê de 3 hezar dar li qadeke 7 hektar li girên gundê Şêx Çopan ê 14 km dikeve başûrê bajarê Kobanê hatin çandin.

Hevserokê Gerînendeya Jîngehê ya Herêma Firatê Arif Balî ji ANHA'yê re axivî û girîngiya vê pêngavê dest nîşan kir. Arîf Balî got: "Ji ber siyasetên paşguhkirinê yên ji aliyê dewleta Sûriyê ve û kêmbûna av û projeyan, kantona Kobanê bibû beyareke zuha. Her wiha tu xizmet ji bo gel pêşkêş nekir. Îro em hewl didin rewşê biguherin, xizmeta gelê xwe bikin û di bin sîwana fikirê rêbertiya me de, xewnên şehîdên xwe pêk bînin."

Balî diyar kir ku armanc ji vê pêngavê vejandina çanda çandina daran û parastina xwezayê ye.

Gerînendeya Jîngehê armanc dike ku îsal di navbera 10 heta 15 daran li herêma Firatê biçîne.

Hevseroka Meclisa PYD'ê ya Herêma Firatê Bêrîvan Îsamîl ku beşdarê pêngavê bûye diyar kir ku aliyî ekolojîk girîng û pîroz e, divê bi qasî qada leşkerî û siyasî were pêşxistin û girîngiya parastina jîngehê bi qasî girîngiya parastina jiyana mirovahiyê ye.

Bêrîvan Îsamîl destnîşan kir ku pêwîst e Rojava bi beşdarbûna hemûyan veguhere herêmeke keskahî û diyar kir ku dê 8'ê Adarê Roja Jînên Kedkar a Cîhanê pêngaveke din bidin destpêkirin.

ANHA