Mamoste Egîd Cîlo li Helebê hat bibîranîn

Endam û xebatkarê Komîteya Perwerde û Zimanê Kurdî Egîd Cîlo 13’ê Sibata 2019‘an di encama qezayeke trafîkê de şehîd bûbû. Bi boneya salvegera 3`yemîn a şehadeta wî, Komîteya Perwerdê û Fêrkirinê ya Civaka Demokratîk bi beşdariya bi sedan mamosteyan li hola civînan a rojavayê taxa Şêxmeqsûd a Helebê, sînevîzyonek li ser berxwedan û jiyana wî weşand û mûm li derdora wêneyên şehîd hatin vêxistin.

Endama rêveber a Komîteya Perwerde û Fêrkirinê ya Civata Demokratîk Nûjîn Bilind ku hevrêya şehîd Egîd Cîlo axivî û got: "Di şexsê şehîd Egîd Cîlo de em bejna xwe li hemberî fedekariya şehîdan ditewînin û dibêjin, şehîdan rêya me ronî kirin û bûn sembola aştiyê."

Nûjîn Bilind ev li axaftina xwe zêde kir: "Min 2011`an şehîd Egîd Cîlo nas kir, Cîlo endezyarekî zimanê kurdî bû û jiyana xwe hemû jê re veqetandibû, li aliyekî din jî kesayeteke demokrat bû û her kes qebûl dikir."

Xwendekara bi navê Rohat Osman stranek li ser şehîd Egîd Cîlo got, dûvre mamosteya Komîteya Perwerde û Fêrkirinê ya Civaka Demokratîk Zozan Dehar helbestek li ser şehîdan xwend. Paşê komeke muzîkê ya xwendekaran çend stranên şoreşgerî gotin.

Di dawiyê de beşdaran sloganên "Şehîd namirin" û "Bijî berxwedana rêber Apo" berz kirin.

(eh)

ANHA