​​​​​​​Komîsyona Jinan a KNK: Jinên Kurd û gelê Kurdistanê komkujiya Parîsê jibîr nakin

Di 9’ê Çileya 2013’an de li paytexta Fransa Parîsê 3 jinên siyasetmedar ên Kurd, Sakîne Cansiz, Fîdan Dogan û Leyla Şaylemez di encama pîlangeriyekê de hatin qetilkirin. 9 sal di ser buyerê re derbas bûn, lê hîna jî kujer û berpirsyarên komkujiyê nehatine darizandin. Ev komkujî bi destê dewleta Tirk a faşîst û bêdengiya dewleta Fransa pêk hat.

Daxuyaniya Jinan a KNK`ê wiha ye:

"Bi kuştina Sakîne, Leyla û Fîdanê re dîplomasiya Tevgera Azadiya Kurdan, berxwedana jinan û rêxistinbûyîna ciwanan hatin hedefgirtin.

Dîsa di 4`ê Çileya 2016`an de li Silopyayê 3 jinên Kurd yên şoreêger Sêvê Demir, Pakîze Nayir û Fatma Uyar ji aliye rejîma faşîst a Tirk ve hatin qetilkirin. Em weke jinên Kurd baş dizanin ku dewleta Tirk a faşîst dijminatiya jinan dike. Dewleta Tirk jinên berxwedêr qetil dike.

Jinên ku di komkujiya Parîsî de hatin qetilkirin jinên hilbijare bûn. Sakîne Cansiz jineke peşeng û sembola berxwedana jinên Kurd bû. Her wiha endama damezrîner a PKKê bû. Tekoşîn, berxwedan, ked û hewldanên Sakîne Cansiz îro bingehên tekoşîna azadiya jinên Kurd e. Ji bo ku karibin vîna jinên Kurd bişkînin û bi wê re jî gelê Kurd tune bikin Sakîne Cansiz kirin hedef.

Bi hezaran sal e feraseta baviksalar ya hêzên mêtînger ji bo desthilatdariya xwe jinên Kurd wekî tahlûkeya herî mezin dibînin. Wexta ku mirov li dîrokê dinêre jinên ku ji bo azadî û jiyaneke bi rûmet li ber xwe dane û tekoşîn kirine bi rêbazên dermirovî hatine qetilkirin. Lê belê tekoşîn û rêxistina jinên Kurd îro li Rojhilata Navîn û tevahî cîhanê bûye hêvî û ronahiya hemû jinên cîhanê.

Em wan 6 jinên leheng bi rêz û hurmet bi bîr tinin û bejna xwe li hember bîranîna wan ditewînin û soza xwe dubare dikin ku em ê ala van pakrewanan hildin jor û em ê heya pêkanîna xeyalên wan di şopa wan de bimeşin û tekoşînê bilind bikin."