Serokkomarê Kazaxistanê 'fermana kuştinê' da

Serokkomarê Kazaxistanê Qasim Comert Tokayev ji bo bidawîkirina çalakiyên li welêt fermana kuştinê da.  Tokayev li ser televîzyonê daxuyaniyek da û got: "Min ferman da ku bêyî hişyarî bê dayîn, bên kuştin."

Serokkomar îdia kir ku "terorîst hîn jî xisarê didin mal û milkan û li dijî welatiyan çekê bi kar tînin.”

Her wiha yekîneyên leşkerî yên Rûsyayê bi navê "bicihkirina pergalê" li Kazaxistanê hatin bicihkirin.

Li welêt krîzeke giran diqewime. Di 5 rojên dawîn de şerekî giran rû dide. Zêdekirina buhayê gazê kir ku çalakiyên protestoyî dest pê bikin û serokkomar hikumet betal kir û ji hevalbenda xwe Rûsyayê alîkarî xwest.

Di çalakiyên protestoyê de herî kêm 26 kes hatin kuştin. Li gorî bîlançoya dawîn bi dehan kes hatine kuştin û zêdetirî hezar kes jî birîndar bûne. Li gorî Wezareta Karên Hundir 18 kes hatine kuştin û 748 kes jî birîndar bûne. Her wiha derdora 2 hezar û 300 kes destgîr kirine.

Tevî ku zêdebûna buhayê gazê bû sedem ku çalakî dest pê bikin, lê serokkomar Tokayev îdia dike ku “çeteyên terorîst çeteyên navneteweyî ne” û li derveyî welat perwerde dîtine.