Şêniyên kantona Efrînê sersaxî ji malbata şehîd Fedekar re xwest

Meclisa Malbatên Şehîdan a herêma Efrînê ji bo şehîd Aqil Reşo (Fedekar Kurdistan) ku di encama bombebarana artêşa Tirk a dagirker li ser navçeya Til Temirê de şehîd bibû, konê sersaxiyê veda.

Bi sedan şêniyên Efrînê li navçeya Fafîn a Şehbayê kom bûn û konê sersaxiyê bi wêneyên rêber Ocalan, wêneyên şehîdan û alên Meclisa Malbatên Şehîdan hatibû xemilandin.

Di merasîmê de rêveberekî Meclisa Malbatên Şehîdan a navçeya Fafînê Ednan Reşo axivî û sersaxî ji malbatên şehîd Fedekar re xwest û got: "Em bejna xwe li hember şehîdên azadiyê ditewînin û di şexsê wan de hemû şehîdên me yên di rêya azadiyê de canê xwe feda kirine, bibîr tînin."

Ednan Reşo wiha dom kir: "Şehîd Fedekar bi hevalên xwe re li Efrînê 58 rojan li ber xwe da, piştî wê derbasî Bakur û Rojhilatê Sûriyê bû û bi lehengî li gel hevalên xwe li dijî dagirkeriya dewleta Tirk û çeteyên wê şer kir. Di encamê de li navçeya Til Temirê giha asta şehadetê. Em ê li ser şopa şehîdan bimeşin, axa xwe biparêzin û li hemberî planên dagirkeriya Tirk bisekinin."

Endamê Meclisa Kantona Efrînê Mihemed Şêx Qenber jî got: "Em niha di qonaxeke girîng û hestiyar re derbas dibin, di hemû qadên dîplomatîk, siyasî û leşkerî de me xwe îspat kiriye."

Endama Meclisa Jinên Azad a kantona Şehba Îman Toko sûcên dagirkeriya dewleta Tirk şermezar kir.

Endama Meclisa Malbatên Şehîdan Emîne Bekîr wesîqeya şehadetê xwend û radestî malbata şehîd kir.

Merasîm bi dirûşmeyên silavkirina berxwedana şehîd bi dawî bû.

(dx)

ANHA