Komîteya Tenduristiyê ya Dêrazorê banga xweparastinê ji vîrusa koronayê kir

Hevserokê Komîteya Tenduristiyê Rêveberiya Sivîl a Dêrazorê Mihemed El-Salim diyar kir ku di pêla yekemîn a vîrusa Koronayê de li gundewarên Dêrazorê nexweşên koronayê tune bûn, lê di pêla duyemîn, sêyemîn û çaremîn de zêdebûneke berçav di hejmara pêketiyên vîrusê de hene, sedema sereke jî negirtina tedbîrên pêşîlêgirtinê ye.

El-Salim got, hejmara kesên ku bi koronayê ketine gihaşt 3 hezar û 551 kes in û ji wan 61 kesan jiyana xwe ji dest dane.

El-Salim bi domdarî got: "Piraniya nexweşên koronayê li herêma Xeranîcê ya gundewarê rojhilatê Dêrazorê ne, ji ber ku ew li kêleka çem e û nêzî herêmên hikumeta Şamê ye. Lê niha em dibînin ku li gundewarê rojavayê Dêrazorê, li herêmên Hermûşiyê, Kuber û Ebû Xeşeb jî hejmara nexweşên korona zêde dibin."

El-Salim wiha lê zêde kir: "Li herêma Kuber hejmara nexweşên korona zêde bidin û ji ber ku klînîka berê ne di xizmetê de ye, klînîkek tendirustiyê tune ye. Me xebatên xwe yên ji bo erêkirinê û diyarkirina bûdceyekê ji Rêveberiya Xweser ji bo avakirina klînîkeke tenduristiyê li herêmê, kiriye û di rojên pêş de xebatên avakirina wê dest pê dikin."

KÊMBÛNA ALAVÊN TENDURISTIYÊ

El-Salim diyar kirk u wan li Kuber û Hermûşiyê derman û tupên oksîjenê ji nexweşên bi vîrûsa Koronayê re peyda kirine û destnîşan kir ku kêmbûneke mezin di tupên oksîjenê de heye û hejmara ku di destên wan de ne, têra tevahî herêmê nake, ji ber ku pêwîstiya her nexweşekî bi zêdetirî 5 tupên oksîjenê heye.

El-Salim di dawiya axaftina xwe de bang li hemû şêniyên Dêrezorê û gundewarê wê kir ku tedbîrên pêwîst ji bo pêşîgirtina li belavbûna vîrusê bigirin.

(dx)

ANHA