Bi hezaran efrînî banga azadiya fîzîkî ya rêber Ocalan kir

Bi dirûşmeya "Azadiya rêber Abdullah Ocalan azadiya me ye" bi hezaran koçberên Efrînê û gelê kantona Şehbayê tecrîda di girtîgeha Îmraliyê de li ser rêber Ocalan hatiye ferzkirin, şermezar kir û banga azadiya fîzîkî ya rêbertî hate kirin.

Şêniyên efrînî li pêşiya têketina bajarokê Babins kom bûn û wêneyên rêber Abdullah Ocalan û pankartên bi nivîsên zimanê erebî û kurdî rakirin.

Şêniyan sloganên "Bijî berxwedana rêber Abdullah Ocalan " û "Na ji bêdengiya civata navneteweyî ya li hemberî tecrîda li dijî rêber Ocalan ji hêla desthilata Tirk ve " berz kirin.

Li qada bajarok şêniyan deqeyeke rêz girt, piştre hevserokê Meclisa Kantona Efrîn Mihemed Naso axivî û got: "Em berxwedana rêber Abdullah Ocalan a di girtîgeha Îmraliyê de û têkoşîna wî ya li dijî zilmê silav dikin."

Naso îşaret bi sûcên dewleta Tirk a dagirker li dijî mirovahiyê û gelê Rojhilata Navîn kir û wiha dewam kir: "Her wiha em piştgiriya dewleta Tirk a dagirker a ji komên çeteyan re şermezar dikin û dibêjin, bêdengiya civata navneteweyî ya li hemberî kiryarên dewleta Tirk nîşaneya hevkariya wê û erêkirina li ser zilmê ye."

Naso diyar kir ku rêber Abdullah Ocalan jiyana xwe kir xizmeta mirovahî û adaletê.

Dûvre li ser navê Meclisa Kantona Şehbayê Necah Keleş axivî û got, hêzên navneteweyî di serî de Brîtanya bi desteka DYA`yê di siyasetên xwe israr dikin û komploya li dijî rêber Abdullah Ocalan didomînin.

Necah Keleş piştrast kir ku proje, felsefeya rêber Abdullah Ocalan û neteweya demokratîk ji bo gelan bûne mînak û rêber Ocalan girtîgeha Îmraliyê veguherand çavkaniya aştî û mirovahiyê.

Necah Keleş îşaret bi destkeftiyên gelê Bakur û Rojhilatê Sûriyê kir ku bi saya proje û fikirê neteweya demokratîk ê rêber Ocalan e û wiha gotina xwe bi dawî kir: "Faşîzma Tirk tecrîda li ser rêber Abdullah Ocalan giran kiriye, ji ber ku ji serkeftinên li Rojava ditirse."

(eh)

ANHA