Şêniyên Helebê li dijî tecrîdê meşiyan

Pêkhateyên taxên Şêxmeqsûd û Eşrefiye yên Helebê, endamên saziyên sivîl, partiyên siyasî û Hêzên Ewlekariya Hundirîn tev li meşe bûn ku bi dirûşma “Dem dema azadiya Serok e” li dar ket.

Şênî destpêkê li pêşiya hola civînan a li beşa rojavayê taxa Şêxmeqsûd kom bûn û ber bi Meclisa Şehîd Kelhat ve ya li beşa rojhilatê taxê meşiyan.

Meş li pêşiya meclisê rawestî û veguherî mitîngê. Di mitîngê de endama Kongreya Star Mewlîde Silêman axivî û destnîşan kir ku tecrîda li ser rêber Abdullah Ocalan heta roja me ya îro berdewam e û got: “Vîna me tu carî naşikê û heta serokê me rizgar nebe, berxwedana me berdewam e.”

Mewlîde Silêman destnîşan kir ku bi saya rêber Abdullah Ocalan gelek destkeftî hatin bidestxistin û wiha domand: “Bi saya fikr û felsefeya rêber Abdullah Ocalan a ku aştî, edalet û wekhevî ji xwe re kirine bingeh, cîhanê Kurd nas kirin.”

Mewlîde diyar kir ku dewleta Tirk ji ber projeya demokratîk a rêber Abdullah Ocalan tecrîdê lê ferz dike û giran dike, ji ber ku ev proje ne li gorî berjewendiyên wê yên siyasî ne û li ser hebûna xwe xeter dibîne.

Her wiha endamê Partiya Yekitiya Demokratîk (PYD) Elî Mistefa axivî û got: “Bi saya fedakariyên rêber Abdullah Ocalan me rastiya xwe nas kir.”

Mistefa daxuyand ku dê bi felsefeya rêber Abdullah Ocalan li hember zilmê bisekinin û dê bi ser bikevin û heta rêber Abdullah Ocalan azad nebe, dev ji têkoşînê bernadin.

Şêniyên ku tev li meşê bûn, tecrîd şermezar kir û soza mezinkirina têkoşînê heta pêkanîna azadiya fîzîkî ya rêber Abdullah Ocalan da.

(şx)

ANHA