​​​​​​​Malbatên şehîdan ên Helebê piştgirî dan çalakiya li deriyê Sêmalkayê

Têkildarî çalakiya Meclisa Malbatên Şehîdan a Herêma Cizîrê ya li deriyê Sêmalka ya bi banga wergirtina cenazeyên gerîla Tohildan Raman û Serdem cûdî yên ku di kemîna hêzên PDK'ê de şehîd bûne û helwesta PDK'ê ya radestnekirina cenazeyên şehîdan, malbatên şehîdan ên taxa Şêxmeqsûd a Helebê ji ANHA'yê re axivîn. Malbatan piştgiriya xwe ji çalakiya li Sêmalkayê re anîn ziman û gotin, PDK`ê sîxurê dewleta Tirk a dagirker e û projeyên wê li Başûrê Kurdistanê pêk tîne.

Li gorî Navenda Ragihandin û Çapemeniyê ya HPG`ê, çekdarên PDK`ê di 28 – 29`ê Tebaxa borî de li navçeya Xelîfanê kemînek ji 7 gerîlayan re danîn û di encama wê de 5 gerîla şehîd bûn, yek birîndar bû dil hate girtin û yek ji vegeriya nuqteya xwe.

Bavê şehîd Hewlêr Bahoz, Fewzî Mistefa got, şehîdxistina gerîlayan ji aliyê hêzên PKD`ê ve xiyanetek li dijî gelê Kurd e û wiha domand: "Em sîxurtiya PDK`ê ya ji dewleta Tirk re ku êrişî nuqteyên HPG`ê yên li Başûr bike, qebûl nakin."

Fewzî Mistefa diyar kir ku ev du meh in Meclisa Malbatên Şehîdan konê çalakiyê li deriyê Sêmalkayê vedaye û bang li PDK`ê dike da ku cenazeyên şehîdan radestî malbatên wan bike, lê PDK`ê bersiva van bangan nade.

Mistefa kirinên PDK`ê yên li dijî cenazeyên şehîdan şermezar kir  û derexalqî bi nav kir, her wiha got, xiyaneta PDK'ê xizmeta doza kurdî nake.

Fewzî Mistefa bang li PDK`ê kir ku bi derewên dewleta Tirk neyê xapandin ku dixweze tevlîheviyê di navbera kurdan de çêke û projeya yekitiya kurdan bi bin bixe, her wiha bang li hêzên Kurd  kir ku ji bo derxistina dagirkeriyê ji Kurdistanê yekitiya xwe ava bikin.

Bavê şehîd Rêzan, Mihemed Mistefa sedema hevkariya PDK'ê ya bi dewleta Tirk re pirsî û wiha axivî: "Gerîla ji bo rizgarkirina xaka Kurdistanê û bidawîkirina hebûna dewleta Tirk li ser xaka Kurdistanê tê dikoşin, lê ji aliyê PDK`ê ve rastî astengiyan tên. Herî dawî jî PDK`ê red dike cenazeyên gerîlayên şehîdan radestî malbatên wan bike."

Mihemed Mistefa destnîşan kir ku berjewendiyên hevbeş ên di navbera PDK`ê û dewleta Tirk de dibin sedem ku PDK'ê cenazeyên şehîdan radest neke, her wiha ditirse ku tawana xiyaneta li dijî wê, were îsbatkirin.

Dayika şehîd Serbilind, Zerîfe Îsa jî siyaseta PDK`ê ya li dijî gelê Kurd şermezar kir û bang li PDK`ê kir ku cenazeyên şehîdan radestî malbatên wan bike. Zerîfa ev tişt anî ziman: "Bese ji xiyanet û dijminatiya li biyarên we yên Kurd re."

Zerîfa diyar kir ku ew ê asta têkoşînê xurt bikin heta ku cenazeyên şehîd Serdem û Tolhildan radestî malbatên wan werin kirin.

(bx)

ANHA