Li Qamişlo merasîma sersaxiya ya şehîd Xebat Hîmo hate lidarxistin

Meclisa Malbatên Şehîdan îro merasîmeke xiyabî ji bo şehîd Rewan Osman (Xebat Hîmo) li dar xist.

Piştre bi sedan şêniyên Qamişlo, endamên saziyên sivîl, rûspiyên Ereb û Kurd berê xwe dan konê sersaxiyê yê li pêş mala şehîd a li gundê Hîmo yê Qamişlo hatiye lidarxistin.

Di merasîma sersaxiyê de endamê Meclisa Malbatên Şehîdan a Qamişlo Kêfo Osman axivî û hemû şehîdên azadiyê bi bîr anîn û got: “Tevgera rizgariya Kurdistanê, tevgera şehîdan û berxwedanê ye. Bi hemû rêbazan û li ser bingeha fikrê şehîdan em ê têkoşîn û berxwedana xwe berdewam bikin ta ku azadî û serkeftinê pêk bînin.”

Kêfo Osmanî îşaret bi rêbazên şerê taybet ên ku dewleta Tirk li dijî gelên herêmê dimeşîne û got: “Divê em ji gef û îstixbarata dewleta Tirk baldar bin.”

Endamê Meclisa Serokatiyê ya Meclisa Sûriya Demokratîk (MSD) Hisên El-Ezam axivî û got şoreşa Bakur û Rojhilatê Sûriyê şoreşa azadiyê ye û divê dijmin baş bizane ku ev şoreş dê bi berxwedana şehîdan li dar be. El-Ezam axaftina xwe wiha domand: “Agahiyên der barê radestkirina herêmên Rêveberiya Xweser de ne rast in. Hewldanên me ji bo çareserkirina aloziya Sûriyê li ser bingeha çareseriya aştiyane berdewam in. Diyaloga sûrî-sûrî divê li Şamê be, ne li Cinêvê.”

Dayika şehîd Xebat Hîmo Cewahir Osman jî diyar kir ku ev roj ji bo wê rojeke dîrokî ye û got: “Hîmo ne şehîdê malbatê yê yekemîn e, beriya wê birayê wî Hozan di berxwedana li hemberî çeteyên DAIŞ`ê li Til Birakê de şehîd bûye."

Dayika şehîd Hîmo wiha domand: “Bila dijmin bizane ku em serî natewînin. Her şehîdek me nêzî azadiyê dike û berxwedan û têkoşîne me mezin dike. Madem bi hezaran mîna Hozan û Xebat li eniyên şer li ber xwe didin, dewleta Tirk nikare vîn û şoreşa me têk bibe.”

Piştre Meclisa Malbatên Şehîdan wesîqeya şehadetê xwend û radestî malbatê kir.

(şx)

ANHA