Konferansa malbatên şehîdan ên Tirbespiyê bi dawî bû

Vê sibehê xebatên 7’emîn konferansa Meclisa Malbatên Şehîdan a Tirbespiyê ya Qamişlo ya herêma Cizîrê bi diruşma"Bi şerê gel ê şoreşgerî em ê faşîzima dewleta Tirk û dagirkeriyê têk bibin" li dar ket. Di konferansê de 210 delge, şandeyên ji QSD, YPJ, YPG, Mala Êzidî ya Tirbespiyê, nûnerên ji partiyên siyasî û saziyên Rêveberiya Xweser a Demokratîk beşdar bûn.

Xebatên konferansê bi deqeyeke rêzgirtinê dest pê kir, dûvre Zeyneb dayika şehîd Simko, Mihemed û Gêlan axivî û lidarxistina konferansê li tevahî gelên herêm ji Kurd, Ereb û Suryan pîroz kir û hêviya serkeftinê xwest.

Dûvre endama rêveber a Kongreya Star Mecdolîn Elî, endamê rêveber ê Partiya Yekitiya Demokratîk (PYD) Fesîh Hisên û yek ji fermandarên QSD’ê Zêdan Elî axivîn û lidarxistina konferansê li tevahî malbatên şehîdan pîroz kir û da zanîn ku malbatên şehîdan xwedî erka pêkanîna aştî û azadiya civakê ne û pêşengê têkoşîn û berxwedanê ne.

Axêveran diyar kir ku dagirkeriya Tirk hewl da û hîna hewl dide destkeftiyên şehîdan têk bibe, her wiha bang kir ku hevgirtî bin da ku parastina destkeftî û armancên şehîdan bikin.

Piştre rapora salane ya Meclisa Malbatên Şehîdan bi zimanên kurdî û erebî hat xwendin, deriyê nîqaş û nêrînan û nirxandina xebatên salên borî hat vekirin, her wiha pêşniyarên ji bo xebata meclisê di pêşerojê de hatin kirin

Dûvre rêveberiyeke nû ji bo Meclisa Malbatên Şehîdan a Tirbespiyê ku ji 9 endaman pêk tê hat hilbijartin.

Konferans bi gelek biryaran bi dawî bû:

-Ji bo azadiya rêber Apo têkoşîn were xurtkirin.

-Tevahî pirsgirêkên malbatên şehîdan bêyî derengxistin bi rêya Meclisa Malbatên Şehîdan werin çareserkirin, were xwestin dê komîte ji bo vê yekê werin avakirin.

-Divê Meclisa Malbatên Şehîdan di nav malbatên şehîdan û civakê de saziya pêşeng be.

-Ji bo şopandina rêxistinbûyîna malbatên şehîdan û diyarkirina erk û peywiran di saziyê de komîteyeke taybet were avakirin.

-Xebatên perwerdeyê di Meclisa Malbatên Şehîdan de were domandin.

-Divê Meclisa Malbatên Şehîdan li hemberî êrişên li ser nirxên şehîdan û felsfeya rêbertiyê bisekine.

-Ji bo pêşxistina xebatê, divê Meclisa Malbatên Şehîdan bi hemû saziyan re koordîne bike.

-Divê Meclisa Malbatên Şehîdan, li ser pirsgirêkên diravî û aborî yên malbatên şehîdan bisekine û li gorî derfetên heyî projeyên aborî veke.

-Divê Meclisa Malbatên Şehîdan pêşengtiya civakê di rêxistinkirina gelê şoreşger li ser fikir û felsfeya rêbertî de bike.

(fr)

ANHA