Li Şehbayê broşorên hişyarkirina li ser xetereyên karkirina zarokan

Bi armanca hişyarkirina civakê li ser xetereyên karkirina zarokan, Komîteya Lênêrîna Civakî û Nivîsgeha Parastina Zarokan broşorên hişyariyê bi zimanê erebî û kurdî li xwediyên firoşgehên bazirganî û pîşesazî li bajarok û navçeyên kantona Şahba, belav kirin.

Komîteyê hemleya hişyarkirinê li Fafînê, Ehdas, Ehrez û Til Rifet da destpêkirin. Her wiha pankart li ser dîwaran daliqandin û broşorên ku agahî û şîretên têkildarî girîngiya sînordarkirina karkirina zarokan û metirsiyên wê, belav kir. Tê payîn ku di qonaxa duyemîn de dê broşor li navçeya Şêrawa were belavkirin.

Yek ji rêveberên Nivîsgeha Parastina Zarokan Rûstem Yûsif ji ajansa me re got armanca hemleyê hişyarkirina civakê li ser metirsiyên karkirina zarokan di şert û mercên şer de ye.

Yûsif destnîşan kir ku zarokên kantona Şehba ji ber êrişên berdewam ên artêşa Tirk a dagirker û çeteyên wê yên li ser herêmê bi şert û mercên dijwar rû bi rû ne.

Yûsif diyar kir ku hemle bi hevkariya Komîteya Lênêrîna Civakî û Nivîsgeha Parastina Zarokan pêk hat.

Yûsif bang li hemû saziyên kantona Şehba, malbat, Nivîsgega Parastina Zarokan û Komîteya Lênêrîna Civakî kir ku ji bo sînordarkirina karkirina zarokan şert û mercên guncaw ji bo parastina zarokan, peyda bikin.

(dx)

ANHA