Çalakvanên li Sêmalka: Xiyaneta PDK`ê li ser doza kurdî xeterî ye

Êrişên dewleta Tirk a dagirker li ser Herêmên Parastinê yên Medyayê ji 23`ê Nîsana borî ve didomin. Dewleta Tirk di van êrişan de çekên kîmyewî bikar tîne û ev yek bi destekdayîna hêzên PDK`ê tê kirin, yê ku bû sedem ku dewleta Tirk xaka Kurdistanê dagir bike.

Ji ber vê yekê jî bertekên gelê Kurd zêde dibin û ji 5`ê Cotmeha borî ve li dergehê Sêmalkayê çalakiyan lidar dixe da ku cenazeyê şehîd Tolhildan û Serdem ku 28`ê Tebaxê di kemîna Xelîfanê de şehîd bûne, werbigirin.

Yek ji çalakvanên li Sêmalkayê Yûsif Remedan yê ji navçeya Girkê Legê, teqez kir ku çalakiya wan ku di roja 33`an de ye dê heta ku xwestekên malbatên şehîdan pêk werin û cenazeyê her du şehîdan werbigrin, dewam bike. Yûsif Remedan wiha domand: "Em ê çalakiyên xwe li dijî xiyaneta PDK`ê bidomînin.”

Yûsif Remedan, kirinên PDK`ê weke deqeke reş ji partiyekî kurdî re bi nav kir, ku îdiya piştgiriya gel dike û di din wan navan de û bi rêya destekdayîna dijminê gelê kurd sûcan pêk tîne.

Yûsif Remedan destnîşan kir ku dijminatiya PDK`ê ji gelê Kurd re ya bi rêya hedefgirtina gerîla, qebûl nakin.

Hisên Haco jî ev tişt anî ziman: "Em hewl didin azadiya xwe bi rêya berxwedana gerîla ku ji bo gelê Kurd têdikoşîn û canê xwe feda dikin, bidest bixin. Xiyaneta PDK`ê li ser doza kurdî xeterî ye."

(bx)

ANHA