Çalakiya li Sêmalkayê dikeve meha duyemîn, PDK`ê hê jî cenazeyan radest nake

Dayikên Aşîtiyê û mamosteyên kantona Qamişlo îro beşdarî çalakiya konvedanê bûn ya ku ji bo şermezarkirina radestnekirina cenazeyên şehîd Tolhildan Raman û Serdem Cûdî ji aliyê PDK`ê, li dergehê Sêmalka tê organîzekirin. Şehîd Tolhildan Raman û şehîd Serdem Cûdî di kemîna PDK'ê ya 28-29`ê Tebaxê de şehîd bûbûn.

Dayikên Aşîtiyê û mamosteyên Qamişlo li pêşiya konê çalakiyê yê li dergehê Sêmalka yê li ser sînorê bi Başûrê Kurdistanê re, rawestiyan û li wir daxuyaniyek da raya giştî.

Endamê rêveberiya Komîteya Dibistanan a Girkê Legê Ebdulezîz Mîrza daxuyani xwend û tê de wiha hate gotin:

 “Di demekê de ku dewleta Tirk hewl dide bi rêya guhartina demografiya axa Kurdistanê û bikaranîna çekên kîmawî, gelê Kurd tune bike, Partiya Demokrat a Kurdistanê (PDK) piştgiriya dewleta Tirk di hedefgirtina gerîlayan û tevgera rizgariya Kurdistanê de dike.”

Di daxuyaniyê de hat destnîşankirin ku di qonaxa Kurdistan tê re derbas dibe de, tê xwestin ku partiyên kurdî bibin yek û li dijî plan û komployên li dijî kurdan bisekinin.

Her wiha bang li  PDK'ê hat kirin ku cenazeyên şehîdan radestî malbatên wan bikin û daxwazên xwepêşandêran bi cih bînin.

Ruxmî ku 31 roj di ser çalakiya konvedanê re derbas bûn jî, lê belê hîna jî PDK'ê cenazeyan radest nake.

(dm)

ANHA