Li kantona Şehbayê peymangeheke tenduristiyê hate vekirin

30 xwendekaran piştî ezmûna qebûlkirinê ya di 10'ê Cotmehê, dê di peymangehê de perwerde bibin.

Di merasîma vekirina peymangehê de hevseroka Desteya Tenduristiyê Hêvîn Hisên, hevserokên Meclisa Rêveber a Efrînê Bekir Elo û Şîraz Hemo, bi dehan malbatên şehîdan, endamên saziyên sivîl û xebatkarên peymangehê û xwendekaran, amade bûn.

Hêvîn Hisên vekirina peymangeha tenduristiyê li gelê kantona Efrînê û malbatên şehîdan pîroz kir. Hêvîn Hisên bal kişand ser siyaseta qirkirinê ya dewleta Tirk a li dijî gelên Bakur û Rojhilatê Sûriyê û got: "Aliyên ku dixwazin me qir bikin, dê nekarin îrade û berxwedana me bişikînin."

Têkildarî peymangehê, Hêvîn Hisên got xwendekarên peymangehê dê di nava 2 salan de li ser destê pispor û kadroyên bijîşkî bi awayekî pratîk û teorîk perwerda xwe bibînin, piştî bidawîkirina salên xwendinê li nexweşxane, klînîk û navendên bijîşkî bêne erkdarkirin.

Hevserokê Meclisa Rêveber a herêma Efrînê Bekir Elo jî vekirina peymangehê li xwendekar, kadroyên perwerdeyê û gelê Efrînê re pîroz kir. Elo piştrast kir ku ev pêngav bersivek e ji sûcên dagirkeriya Tirk ên li dijî gelê Efrînê û tevahiya herêmên dagirkirî.

Di dawiya merasîmê de, beşdaran govend gerandin.

(dx)

ANHA