Kîmyebarana dewleta Tirk û xiyaneta PDK`ê berxwedana gerîlayan lawaz nake

Dewleta Tirk a dagirker hîna jî sûcên xwe yên li dijî gelên herêmê didomîne. Hin caran Herêmên Parastinê yên Medyayê bi çekên kîmyewî bombebaran dike, caran jî bi balafirên bêmirov li Bakur û Rojhilat Sûriyê erebeyên sivîlan bombebaran dike.

Li gorî daneyên ku Navenda Ragihandin û Çapemeniyê ya HPG'ê, dewleta Tirk a dagirker 323 caran çekên kîmyewî û gazên jehrî li dijî xendek û tunelên leşkerî yên gerîlayan bi kar aniye.

Hevserokê Navenda Çand û Hunerê ya Minbicê Umer Mehmûd got, dewleta Tirk a dagirker li pêşberî çavên civatên navneteweyî li dijî gerîla çekên kîmyewî bi kar tîne. Lê tişta her xerab ew e ku hêzên Partiya Demokrat a Kurdistanê (PDK) hevkariya dagirkeriya Tirk dike û nuqteyên gerîla deşîfre dike û agahiyan dide balafirên Tirkiyê.

Umer Mehmûd bang li PDK'ê kir ku daxwazên xwepêşandêrên li nêzî deriyê Sêmalka pêk bîne û cenazeyên her du şehîdên ku bi destê çekdarên PDK'ê şehîd bûne, radestî malbatên wan bike. Her wiha destnîşan kir ku divê PDK`ê rewşa xwe di ber çavan re derbas bike û vegere partiyeke kurdewarî, ne alaveke di destê Tirkiyê de.

`DIVÊ EM PIŞTA XWE NEDIN KESÎ, JI BER KU HEMÛ DEWLET DIXWAZIN ME TÊK BIBIN`

Kurd ne tenê li çiyayên Kurdistanê ji aliyê dewleta Tirk a dagirker ve tên hedefgirtin û bombebarankirin, lê li her cihê ku Kurd lê hene dewleta dagirker çi bi balafirên şer, çi bi balafirên bêmirov, çi jî bi rêya ajanan wan hedef digire.     

Endama Navenda Çand û Hunerê ya Minbicê û berpirsa perwerdeya govendên gelêrî, Elîsar Berkel wiha got: "Armanca sereke ya dewleta Tirk a dagirker koçberkirin û sirgûnkirina Kurdan e, ji ber vê yekê Kurdan li her derê hedef digire. Her dawî jî li Kobanê erebeyên sivîlan hedef girtin."

Elîsar Berkel bang li Kurdên ku hevkariya dewleta Tirk a dagirker dikin kir ku destê xwe ji rijandina xwîna Kurdan bikişînin û wiha domand:"Divê em pişta xwe nedin tu kesî, ji ber ku hemû dewlet û hêzên biyanî têkbirina Kurdan dixwazin."

 (dx)

ANHA