Bi sedan xwepêşandêrên li dergehê Sêmalka banga radestkirina cenazeyên gerîla dikin

Ji 5’ê vê Cotmehê ve şêniyên herêma Cizîrê ya Bakur û Rojhilatê Sûriyê li dijî hêzên PDK’ê li ser sînorê di navbera Rojava û Başûrê Kurdistanê de xwepêşandanê dikin.

Li gorî daxuyaniya HPG’ê, hêzên PDK’ê di 28-29’ê Tebaxa borî de kemînek ji gerîla re danîn, di encamê de 5 gerîla şehîd bûn, tê texmînkirin ku gerîlayek dîl ketiye destê wan û gerîlayek jî bi saxî xwe gihand hevalên xwe.

Malbatên şehîd Tolhildan Raman û şehîd Serdem Cûdî di roja yekemîn a xwepêşandanê de banga radestkirina cenazeyên zarokên xwe kirin.

Li ser wê yekê, Meclisa Malbatên Şehîdan a Herêma Cizîrê li qada dergehê Sêmalka gelek kon vedan û dest bi çalakiya xwepêşandanê ya vekirî kir. Bi sedan jin û mêr tev li çalakiyê bûn. Ji roja destpêkê ve endamên Hêzên Ewlekariya Hundirîn li derdora qada çalakiyê partastinê dikin.

Mihemed Emîn Qasim ê ji Hesekê tev li çalakiya konvedanê bûye, diyar kir ku heta cenazeyên şehîdên bi destê PDK’ê hatine şehîdxistin wernegirin, ew çalakiya xwe bi dawî nakin û got, “Divê PDK’ê encamên kiryarên xwe yên li dijî gelê Kurd, tehmul bike.”

Bi sedan xwepêşandêr wêneyên gerîlayên ji ber xiyaneta PDK`ê û hevkariya wê bi dagirkeriya Tirk re şehîd bûne, rakirine.

Li aliyekî din jî Alan Hesekê got, wekî malbatên şehîdan ew înxaneta PDK’ê qebûl nakin û banga raperîneke kurdî ya giştî li hemberî îxanetê kir.

DI 11’ê Cotmehê de dayikên aştiyê yên ji bajar û bajarokên herêma Cizîrê, pireya di navbera Rojava û Başûrê Kurdistanê de heta nêvî derbas kirin û hewl dan bikevin Başûrê Kurdistanê, lê belê hêzên PDK`ê nehişt 26 dayikên aştiyê derbasî aliyê din bibin û banga radestkirina cenazeyên şehîdan bikin.

 (fr)

ANHA