Li Beyrûtê ji bo şehîdên Til Temirê merasîmeke hate lidarxistin

Li paytexta Lubnan Beyrûtê ji bo endama konseya Leşkerî ya YPJ û endama konseya Leşkerî ya QSD'ê Sosin Mihemed (Sosin Bîrhat), ji fermandarên Meclisa Leşkerî ya Til Temirê Peywan Remedan (Egîd Girkê Legê), şervanên Meclisa Leşkerî ya Til Temirê Elî El-Xerze (Rûbar Hesekê) û şervanê QSD'ê Seyfullah Ehmed ên ku 19'ê Tebaxê di êrişa hawayî ya dewleta Tirk a li ser Til Temirê şehîd bûn û fermandarê YPG'ê Selahedîn Şehabî (Rênas Roj) ê di êrişa dewleta Tirk a li ser rêya Elî Fero ya Qamişloyê de şehîd bûn merasîmê bîranînê hate lidarxistin.

Merasîm ji aliyê Partiya Yekitiya Demokratîk û Kongreya Star ve hate lidarxistin. Bi dehan kurdên li Lubnanê beşdarî merasîmê bû.

Merasîm bi deqeyeke rêzgirtin dest pê kir. Paşê bi navê Rêveberiya Xweser a Bakur û Rojhilatê Sûriyê Ebduselam Ehmed sersaxî ji malbatên şehîdan re xwest û got: "Şehîdên pêşengên me ne, şehîd welatan ava dikin."

Ehmed êrişên dewleta Tirk a dagirker ên li ser herêmên Bakur û Rojhilatê Sûriyê şeremzar kirin û got: "Îradeya gelê me ji hemû planên dijmin xurttir e."

Endama Kongreya Star Zaxo Şiyar şehîd bi bîr anîn û soza şopandina xeta wan da.

Xwişka şehîd Sosin Bîrhat, Cîhan Mihemed behsa kesayeta şehîd Sosin kir û got, şehîd Sosin beriya ku tev li şoreşa azadiyê bibe endameke Koma Agirî ya Dîlanan bû û bi destpêka şoreşa Rojava re berî xwe da Rojava û ji bo jiyaneke azad û demokratîk têkoşiya.

Merasîm bi diruşmeyên "Şehîd Namirin" bi dawî bû.

ANHA