Şêniyên Tirbespiyê ji bo Şengalê meşiyan

Bi diruşma "Bêdengiya cîhanê erêkirina qirkirina xweseriya Êzidxanê ye" bi sedan şêniyên navçeya Tirbespiyê bi hemû pêkhateyên wê daketin qadan, êrişên dewleta Tirk a dagirker ên li ser Şengalê û bêdengiya navneteweyî, hikumetên Bexda û Başûrê Kurdistanê şermezar kirin.

Meş ji pêşiya navenda Kongreya Star a rojhilatê navçeyê dest pê kir û li sûka navendî ya navçeyê dewam kir. Di meşê de diruşmeyên şermezarkirina dewleta Tirk û bêdengiya navneteweyî û erebî hatin berzkirin.

Meş li dawiya sûkê rawestiya. Bi navê Yekitiya Jinên Êzidî yên Rojava Hediya Şemo axivî.

Hediya Şemo destnîşan kir ku bêdengiya hikumetên Bexda û Başûrê Kurdistanê eşkere dike ku hevkarên dewleta Tirk in û qirkirina êzidiyan qebûl dikin.

Hediya Şemo her wiha bang li civata navneteweyî kir ku li hemberî sûcên dewleta Tirk ji bêdengiya xwe derkeve.

Bi navê Mala Êzidiyan a navçeya Tirbespiyê Ziyad Rûstem jî got, dagirkeriya Tirk ji şexê civaka Êzidî de gelê Kurd dike armanc û çand û kevneşopiya resen a gelê Kurd derbe dike.

Rustem bêdengiya hikumeta Bexda û Başûrê Kurdistanê bi "Xiyaneke dîrokî li gelê Kurd" bi nav kir.

Bi navê Meclisa Êzidiyan a Ewropayê Beşîr Şengalê diyar kir ku Erdogan bi hemû rêbazan hewl dide Şengalê vegerîne mîna berê ku hatibû paşguhkirin û bê hêza parastinê bû.

Çalakî bi diruşmeyên silavkirina berxwedana YBŞ û YJŞ'ê bi dawî bû.

ANHA

<iframe width="560" height="315" src="https://www.youtube.com/embed/x-D_ALJupmU" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>