Erebên Şengalê: Hikumeta Iraqê li ku derê ye?

Welatiyên Ereb ên Şengalê li cihê nexweşxaneya Sikêniyê ya bûye hedefa bombebaranên dewleta Tirk a dagirker, diyar kirin ku fermanek nû dijî Şengalê hatiye destpêkirin û bang li Serokwezîrê Iraqê kirin ku were herêmê û ev pirs hat kirin: “Li Şengalê bi dehan jin û zarokên me bi destê dewleta Tirk hatin kuştin, serweriya Iraqê, hikûmet û kerameta wê li kuderê ne?

17 tebax, 2021 15:28

NAVENDA NÛÇEYAN

Welatiyên Ereb ên herêma Şengalê li pêşiya nexweşxaneya gundê Sikêniyê ku balafirên dewleta Tirk a dagirker îro 3 caran bombebaran kir, daxuyaniyek da çapemeniyê.

Endamê Meclisa Gundê Medîban yê Şengalê Sinêd Xanim li ser navê komê axivî û êrîişên dewleta Tirk bi tundî şermezar kirin.

Sinêd Xanim destnîşan kir ku dewleta dagirker êrişî Êzidî û Ereban kiriye û wiha dom kir: “Dewleta dagirker êrişî birayên me yên Êzidî û zarokên me yên Ereb ku di nexweşxaneyê de bûn kiriye. Dewletên dagirker her tim jin û zarokên Şengalê hedef digirin. Em wekî pêkhateya Ereb, vê êrişa hovane ya dewleta Tirk şermezar dikin. Ev êrîş nişan dide ku li hemberî Şengalê û bi taybet li ser civaka Êzidiyan fermanek nû hatiye destpêkirin.”

Sinêd Xanim bê helwestiya hikûmeta Iraqê rexne kir û got: “Em ji Mistefa Kazimî dixwazin ku were li vir binêre ka dewleta Tirk li hemberî Şengal û zarokên me çi dike. Em dipirsin; Li Şengalê bi dehan jin û zarokên me bi destê dewleta Tirk hatin kuştin. Niha serweriya Iraqê, hikûmeta wê, kerameta wê li kuderê ye?”