Salvegera Şoreşa 19'ê Tîrmehê bi coş li Reqayê hate pîrozkirin

Bi wesîleya salvegera 9'emîn a Şoreşa 19'ê Tîrmehê, şahiyeke navendî li Mezreya Hetîn a rojavayê bajarê Reqayê hate lidarxistin. Girseyeke mezin a şêniyan di nav de saziyên sivîl, leşkerî û partiyên siyasî yên ji herêmên Reqa, Dêrazor, Minbic û Tebqayê beşdarî pîrozbahiyê bûn.

Pîrozbahî bi deqeyeke rêzgirtin dest pê kir. Paşê Hevserokê Meclisa Qanûnsaz a Reqayê Xalid Berkel axivî, Hêzên Sûriya Demokratîk silav kir û got: "Destpêkê di salvegera 9'emîn a şoreşê de em şehîdên xwe bi bîr tînin, şehîdan rêgez û têgînên klasîkî yên serwer ên ku gel bi rêbazên tund hikum dikirin û gelek pêkhate paşguh dikirin, sererast kir."

Berkel diyar kir ku şoreş hêza xwe ji fikirê neteweya demorkatîk digire, di aloziya Sûriyê de xeta sêyemîn hilbijart û asoyên xilasiya ji aloziyê xêz kir.

Cîgirê Hevserokatiya Meclisa Rêveber a Rêveberiya Xweser a Bakur û Rojhilatê Sûriyê Hemdan El-Ebid, komîtya amadekar a ku bi vê şahiyê rabûye spas kir  û salvegera 9'emîn a Şoreşa 19'ê Tîrmehê pîroz kir.

El-Ebid got: "Em bangewazên aştiyê ne, em ne terorîst in mîna ku hin îdia dikin, nîşaneya vê yekê jiyana hevbeş a li herêmên Bakur û Rojhilatê Sûriyê ye."

Hemdan El-Ebid kiryrên dewleta Tirk, çeteyên Sûrî û hikumeta Şamê yên li dijî herêmê şermezar kirin û banga diyalogên niştimanî aliyên sûrî kir, her wiha bang li pêkhateyên Bakur û Rojhilatê Sûriyê kir ku ji bo serxistina Rêveberiya Xweser bixebitin.

Bi navê Kombûna Jinên Zenûbiya, Xûd Îsa jî rola jinan di şoreşê de silav kir û diyar kir ku jinan karîn beşdarî rizgarkirina herêmê bibin.

Xûd Îsa berxwedana QSD'ê silav kir û pensê Rêveberiya Xweser da ku roleke girîng da jinan.

Koma mûzîkê ya Reqayê stranên şoreşgerî û folklorî gotin.

Paşê Sekretêra Giştî ya Partiya Sûriya Pêşerojê Sîham Dawûd axivî û wiha got: "Em di Rêveberiya Xweser de bi hemû pêkhateyan yek in" her wiha şehîdên azadiyê yên şoreşê bi bîr anîn.

Sîham Dawud bal kişand ser rola hikumeta Şamê di dirêjkirina temenê aloziyê de û diyar kir ku ji ber siyasetên wê hejmareke mezin xelkê Sûriyê koçber bûn.

Sîham sûcên Tirkiyê yên li herêmê ji qutkirina avê û sûcên wê yên li herêmên dagirkirî, her wiha rola navneteweyî di kûrkirina aloziya Sûriyê û hevkariya wê bi Tirkiyê re, biryara girtina deriyê sînor ê Til Koçerê û vekirina deriyê Bab El-Hewa yê di bin serweriya çeteyan de, di heman demê de rola îtîlafa Sûriyê şermezar kirin.

Piştre koma zarokan a ji Minbicê şanoyeke li ser şehîdan pêşkêş kir.

Bi navê QSD'ê Feysel El-Salim salvegera şoreşê pîroz kir û got: "Em QSD'ê li şûna cîhanê me şerê rêxistina herî tundraw kir, şoreşa Rojava bi hemû wateyên xwe yên bi nirx şoreşa azadiyê ye ya ku zilm û koletiyê qebûl nake."

Di pîrozbahiyê de bi navê ciwanên şoreşger Ehmed El-Cemîlî jî axivî, berxwedana gerîlayan a li hemberî êrişên dagirkeriyê yên dewleta Tirk silav kir û bang li ciwanan kir ku beşdarî Tevgera Ciwanên Şoreşger bibin."

Paşê endamên komîteya amadekar a pîrozbahiyê plaketên spasiyê dan Meclisa Rêveber a Rêveberiya Xweser, rêveberiyên sivîl ên demorkatîk ên Reqa, Tebqa, Minbic, Dêrazor, Kombûna Jinên Zenûbiya, QSD, Meclisa Malbatên Şehîdan, Gaziyên Şer û Tevgera Ciwanên Şoreşger.

Di dawiya pîrozbahiyê de Hemdan El-Ebid bang li civaka navneteweyî û Neteweyên Yekbûyî kir ku Rêveberiya Xweser nas bikin.

ANHA

<iframe width="560" height="315" src="https://www.youtube.com/embed/OV2o0wdLt1g" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>