Li Til Rifetê çalakiyên hefteya çandê di roja sêyemîn de didomin

Li navçeya Til Rifetê, çalakiyên hefteya çandê bi diruşma "Bi çanda Hîlala Zêrîn û hunera gelê şoreşger em ê dagirkeriyê têk bibin" berdewam dikin.

ÇAND Û HUNER

13 tîrmeh, 2021 19:57

ŞEHBA

Çalakiyên hefteya çandê ya ji aliyê Tevgera Hîlala Zêrîn a Herêma Efrînê ve hatiye organîzekirin, bi beşdarbûna bi sedan şêniyan û komên hunerî di roja sêyemîn de li navçeya Til Rifetê didomin.

Çalakî di qeyeke rêzgitinê dest pê kirin, dûvre endamê rêveber ê Tevgera Hîlala Zêrîn Ronahî Şêxo li ser armanca vê çalakiyê axivî û wiha got: "Armanc jê parastina çanda dayikê ye ya ku bi hezaran sal xwe parastiye û ji xaka Mezopotamyayê dest pê kiriye."

Ronahî Şêxo wiha domand: "Em hewl didin bi rêya vê çalakiyê çanda kurdî vejînin, ber ku dewleta Tirk hewl dide çand û nasnameya Kurd, bi taybet li kantona Efrînê ya dagirkirî têk bibe."

Piştî axaftinê, koma Şehîd Hêva stranên şoreşgerî pêşkêş kirin, koma Şehîd Viyan Soran dîlaneke folklorîk a taybet bi Efrînê pêşkêş kir, her wiha dayika Emîne Zênkî stranên gelêrî yên efrînî gotin, koma Şehîd Barîn şanoyek li ser hezkirna xak, çand û çandina daran pêşanda.

Li dawiyê jî, cilên folklorîk ên hin herêm û pêkhateyên Bakur û Rojhilatê Sûriyê hatin pêşkêşkirin.

(fr)

ANHA