Çalakiyên meha çandê li Qamişloiyê dest pê kirin

Çalakiyên "Meha Çand û Hunerê" bi diruşma "Bi çand û hunera neteweya demokratîk em ê dagirkeriyê têk bibin û serkeftinê misoger bikin" ji aliyê Tevgera Mezopotamyayê ya Çand û Hunerê ve hatiye organîzekirin.

Çalakiyên "Meha Çand û Hunerê" bi mîhrîcaneke stranan li stada Heysem Kiço ya bajarê Qamişlo û bi amadebûna bi dehan şêniyên bajarê Qamişlo dest pê kir. Çalakî wê heta 26'ê Tîrmehê dewam bike.

Gelek komên stranan ên girêdayî navenda çand û hunerê berhemên xwe pêşkêş kirin.

Mîhrîcan bi deqeyeke rêzgirtin dest pê kir. Piştre endama Tevgera Mezopotamya ya Çand û Hunerê Nesrîn Botan axivî û got: "Dijmin bi domdarî çand û hunera gelê Kurd dike armanc, lê bi çand û hunera xwe em ê bersiva van êrişan bidin."

Nesrîn Botan ev li axaftina xwe zêde kir: "Bi van çalakiyên xwe em rê li ber şerê kurd bi kurd bigirin, em nahêlin ku dîrok xiyaneta kurdan li hemberî hev binîvisîne. Li ser vî esasî em ê bi domdarî çalakiyên wiha li ser asta Bakur û Rojhilatê Sûriyê li dar bixin."

Piştre, Koma Botan a ji bajarê Qamişlo, Koma Zîlan a ji Dirbêsiyê, hunermend Baran Dilbuhar û Sumeya Mihemed stranên foklorî gotin.

Ev çalakî di çarçoveya pêngava "Dem dema azadiyê" de hatiye organîzekirin, dê li bajarên Hesekê, Qamişlo, Dirbêsiyê û Dêrikê werin lidarxistin û li her bajarekî 3 rojan dewam bike.

ANHA