Şêniyên Minbicê du şehîdên xwe oxir kirin

Bi sedan şêniyên Minbicê cenazeyê şervanê Meclisa Leşkerî ya Minbicê Mihemed Ehmed El-Ehmed (Aram) yê ku 17'ê Hezîranê li ser erka xwe şehîd bû û şervanê Erka Xweparastinê Tirkî Himêdî bi merasîmekê li Goristana Şehîdan a Minbicê veşartin.

Şêniyan cenazeyê şehîdan ji pêşiya nexweşxaneya Firatê wergirtin û bi kerwanekî ber bi Goristana Şehîdan ve çûn.

Merasîm bi deqeyeke rêzgirtin û torana leşkerî ya Meclisa Leşkerî ya Minbicê dest pê kir. Piştre Berdevkê Fermî yê Meclisa Leşkerî ya Minbicê Şervan Derwîş axivî û got: "Em li welatekî û li ser axekê dijîn ku ji bo azadiyê hîna pêwîstiya wan bi xwîna heye. Hîna dijmin li derdora me hene û dema ku têk diçin, bi rêbazên cûda dixwazin tevliheviyê li vî welatî çêbikin."

Derwîş anî ziman ku erka wan şopandina rêya şehîdan ta pêkanîna ewlehiyê ye û got: "Dema em bighêjin çareseriyeke siyasî ji bo tevahî Sûriyê wê demê erka me bi dawî dibe, lê madem alozî û dagirkerî hîne hene, em ê xebata xwe bidomînin heya ku gelê xwe bighînin ewlehiyê."

Berdevkê Meclisa Leşkerî ya Minbicê Şervan Derwîş di dawiya axaftina xwe de got: "Her yek xwedî berpirsyartî û maf e, yên ku banga maf dikin divê erka xwe jî bi cih bînin. Yên herî dawî ku bi navê gel, ewlehî û aramiya vê welatî biaxivin rejîm û alîgirên wê ne û yên her dawî yên ku behsa azadî û rûmetê bikin jî çeteyên Tirkiyê ne."

Bi navê Meclisa Malbatên Şehîdan a Minbicê Rebîh Îzedîn jî got: "Bêyî fedekariyên şehîdan tu netewe nikare bi azadî û rûmet bijî. Şehîd mertalên ku planên dijmin û êrişkaran têk birin û berdêlên giran dane da ku em bi aştî bijîn."

Di berdewama merasîmê de, bi nav Rêveberiya Sivîl a Demokratîk a Minbic û gundewarê wê Hevseroka Meclisa Rêveber a Minbicê Nûra El-Hamid jî banga xwedîderketina li keda şehîdan kir û wiha got: "Ji bo wefedariya bi xwîna şehîdan divê em bi dilsozîr û bi xurt kar bikin da ku bajarê Minbicê ava bikin û êriş û komployên li ser vî bajarî têk bibin. Her çiqas em yek bin em ê karibin serkeftinan pêk bînin."

Piştî axaftinan nasnameyên şehîdan ji aliyê endama Meclisa Malbatên Şehîdan Cemîla Îbrahîm ve hatin xwendin û radest malbatên wan hatin kirin.

Cenazeyên her du şehîdan di nava diruşme û tîlîliyên dayikan de hatin veşartin.

ANHA