Qamişlo ji bo meşa mezin a rûmetê xwe hazir dike

Berxwedana gerîla û gelê Kurd li dijî êrîşên dagirker û qirker ên dewleta Tirk ên li ser Başûrê Kurdistanê didome, li aliyê din ve gelên Bakur û Rojhilatê Sûriyê jî her roj derdikevin meydanan û nerazîbûna xwe ya li dijî dagirkeriya Tirk nîşan didin.

Nexasim bi pravakasyona li Metîna ku tê xwestin PDK li dijî gerîla tevî nav şer bikin û daxuyaniyên ji aliyê PDK'ê ve li nav Kurdan bû sedema nerazîbûnên tund.

Gelên Bakur û Rojhilatê Sûriyê li dijî zêdebûna êrîşan a li ser gerîlayên azadiyê yên Kurdistanê û li dijî hewldana ku PDK tevî nav vê bibe derdikeve meydanan û helwesta xswe nîşan dide.

Bi rojan e gelên herêma Cizîrê çalakiyên şermezariyê dike û 10'ê Hezîranê jî di vê çarçoweyê de wê di saet 17:00'an li Qamişlo meş û mîtîngek were li darxistin. Tê payîn ku bi dehhezaran mirov tevlî vê meş û mîtîngê bibin û bi dirûşma ''Li dijî dagirkerî û bêbextiyê meşa rûmetê' nerazîbûna xwe li dijî êrîşên dagirker û hevkarên wan ên xwecihî nîşan bidin.

Bi dehhezaran şêniyên bajêr li çerxereya Osman Sebrî wê kom bibin û ji vir dest bi meşê bikin. Meş wê heta bi stadtyoma 12'ê Adarê bidome, tê payîn li meydana li rex stadyomê meş veguhere mitîngekê. Komîteya amadekar a meşê bang li gel kir ku li dijî dagirkerî û bêbextiyê rabe ser xwe.

ANHA