Li Hewlêrê çalakiya li dijî dagirkeriya dewleta Tirk

Ji 23'yê Nîsanê ve li ser herêmên Başûrê Kurdistanê êrişên dagirkeriyê dewam dikin. Êriş li gundan tên kirin û gun têne valakirin. Hikumeta Başûrê Kurdistanê jî li ber vê yekê bê deng e.

Li dijî êrişên dagirkeriyê, nerazîbûna li Başûrê Kurdistanê mezin dibe. Partiya Komunîst a Kurdistanê (KKP) li dijî êrişên dagirkeriyê û li hemberî hebûna leşkerî ya li herêmê, li ber parlamentoyê çalakiyeke şermezarkirinê li dar xist.

Bi navê çalakgeran daxuyaniyek hate dayîn û wiha hate gotin: "Peymana navbera Iraqê û dewleta Tirk a li ser ewlehiya sînorê divê bê betalkirin û li dijî dagirkeriya dewleta Tirk sînor bê parastin. Divê dewleta Tirk ji Herêma Kurdistanê bê derxistin."

Di daxuyaniyê de binpêkirina hiqûqa navneteweyî, xisara li xwezayê hatiye kirin û birîna daran hate bibîrxistin û hate ragihandin ku ev yek sûcê şer e. Çalakgeran xwest xweza bê parastin û ji dewleta Îranê jî hate xwestin ku dawî li binpêkirinan bîne.

Di daxuyaniya KKP'ê de hate gotin: "Ji ber rêveberiya nebaş a Herêma Kurdistanê, maf û azadî rojane têne binpêkirin. Mûçeyên xebatkar û teqawîtbûyiyan têne kêmkirin. her wiha buhayê alavan hatiye zêdekirin û bac zexteke giran li şêniyan dike."

Partiya Komunîst piştî daxuyaniyê daxwazên xwe yên li dijî êrişên dagirkeriyê û yên ji bo mafên karkeran radestî parlamentoyê kirin.