Merasîma bîranînê ya şehîd Zafer Tolhildan li Qamişloyê hat lidarxistin

Şehîd Mihemed Hisên (Zafer Tolhildan) di 21`ê Adara 2013`yan de tev li HPG`ê bûye û di 3`yê Gulana 2021`an de, di encamê êrişên artêşa Tirk a dagirker ên li ser herêma Avaşîn de şehîd bûbû.

Merasîma bîranînê li Goristana Şehîd Delîl Sarûxan a li Qamişloyê li dar ket. Li goristanê wêneyên şehîdên HPG û YJA-Starê ku bi şehîd Zafer Tolhildan re şehîd bûbûn, hatibûn rakirin. Navên her şeş şehîdan wiha ne: Seher Bîngol (Rûken Zagros), Bîşeng Hezer (Sarya Diyar), Kamûran Alpsar (Serhat Giravî), Şehbaz Seydo (Canfeda Hesekê), Ubeyt Mevludî (Xebat Aso) û Mistefa Şîmşek (Kamuran Amed).

Di merasîmê de endama Meclisa Malbatên Şehîdan Hêvî Seyid axivî û sersaxî ji malbata şehîd re xwest û hemû şehîdên tevgera azadiyê bi bîr anîn. Her wiha berxwedana şervanên azadiyê li Herêmên Parastinê yên Medyayê silav kir.  

Endamê Partiya Yekitiya Demokratîk (PYD) Sabir Mihemed axivî û di kesayeta şehîd Zafer Tolhildan de şehîdên pêngava Bazên Zagrosê bi bîr anîn. Mihemed diyar kir ku êrişa li ser herêmên Avaşîn, Metîna û Zapê, armanca wan qirkirina gelê Kurd bi giştî her wiha hemû destkeftî û nirxê wan e û wiha got: "Ne tenê ev êriş li ser PKK`ê, yên ku dibêjin dewleta Tirk dostê gelê Kurd e û tenê dijminê PKK`ê ye, xwe dixapînin."

Piştre apê şehîd Zafer Tolhildan Ebd El-Qedûs Hisên axivî.

Piştî axaftinan wesîqeya şehadetê ya şehîd Zafer Tolhildan radestî malbata wî hat kirin. Merasîm bi sloganên `Şehîd namirin` û `Bijî berxwedana gerîla` bi dawî bû.

(sb)

ANHA